پاکستانی ریسلر انعام بٹ نے بیچ ریسلنگ کی ورلڈ سیریز میں ایک اور گولڈ میڈل جیت کر ملک و قوم کا نام روشن کردیا ہے۔
خبررساں ادارے کی رپورٹ کے مطابق یونان میں بیچ ریسلنگ کی ورلڈ سیریز کے تیسرے ٹورنامنٹ کا انعقاد ہوا جس کے فائنل میں انعام بٹ نے آذربائیجان کے ریسلر کو شکست دے کر گولڈ میڈل اپنے نام کرلیا ہے۔
رپورٹ کے مطابق فائنل کے مقابلوں میں تین منٹ کی فائٹ 2-2 پوائنٹس سے برابر رہی ، آخری پوائنٹ انعام بٹ نے حاصل کیا جس کی بنیاد پر انہیں میچ کا فاتح قرار دیا گیا ہے۔
واضح رہے کہ بیچ ریسلنگ کی ورلڈ سیریز کا یہ تیسرا ٹورنامنٹ ہے جس کا آغازیونان کے کیٹرینی بیچ پر جمعے کو ہوا تھا جس کے 90 کلو کیٹیگری میں انعام بٹ نے اپنے پہلے میچ میں آذربائیجان کے ریسلر کو شکست دی اور دوسرے میچ میں جارجیا کے پہلوان کو شکست دے کر سیمی فائنل میں جگہ بنائی تھی۔
سیمی فائنل میں انعام بٹ نے یوکرین کے پہلوان کو شکست دی اور فائنل کیلئے کوالیفائی کیا تھا۔
یادرہے کہ بیچ ریسلنگ کے روم میں ہونے والے دوسرے ٹورنامنٹ میں بھی انعام بٹ نے گولڈ میڈل جیتا تھا۔
