بارہ 12سال سے زائد عمر کے بچوں کو سائنو ویک اورسائنو فارم لگانے کی منظوری۔۔ 15 نومبر سے 12 سال سے زائد عمر بچوں کیلئے ویکسینیشن کا آغاز
نیشنل کمانڈ اینڈ آپریشن سنٹر (این سی او سی) نے سماجی رابطے کی ویب سائٹ ٹوئٹر پر اپنے پیغام میں کہا ہے کہ ملک میں 12سال سے زائد عمر کے بچوں کو سائنو ویک اورسائنو فارم لگانے کی منظوری دے دی ہے۔
ان دونوں ویکسینز کی منظوری این سی او سی ہیلتھ ایکسپرٹ کمیٹی نے دی، ادارے کے مطابق بچوں کی ویکسینیشن 15نومبرسے شروع ہوگی، جب کہ 12سال سے زائد کے بچوں کو فائزر لگانے کی منظوری پہلے ہی دی جا چکی ہے۔
وفاقی وزیر اور این سی او سی کے سربراہ اسد عمر نے بھی سماجی رابطے کی ویب سائٹ پر اپنے پیغام میں کہا تھا کہ الحمداللہ 12 سے 18 سال عمر کے 50 فیصد طالب علموں کو کورونا ویکسین کی کم از کم ایک خوراک لگا دی گئی، جس کے بعد ملک بھر میں کورونا ویکسین لگوانے والے طالب علموں کی تعداد 55 لاکھ سے تجاوز کر چکی ہے۔
ان کا کہنا تھا کہ کورونا ویکسین لگوانے میں گلگت بلتستان 68 فیصد طالب علموں کے ساتھ پہلے اور پنجاب 62 فیصد طالب علموں کے ساتھ دوسرے نمبر پر ہے۔
