بیرون ملک بیٹھے بلاگرز کو عمران خان کی سابق اہلیہ جمائما پیسے دے رہی ہے: سابق صدر
سابق صدر وشریک چیئرمین پاکستان پیپلزپارٹی آصف علی زرداری نے پی ٹی آئی کی طرف سے افغان شہریوں کو ووٹرز رجسٹر کروانے کا دعوی کر دیا ہے۔ آصف علی زرداری نے نجی ٹی چینل آج نیوز کے پروگرام "فیصلہ آپ کا" میں گفتگو کرتے ہوئے دعوی کیا کہ پاکستان تحریک انصاف نے افغان مہاجر شہریوں کی بڑی تعداد کو ووٹر لسٹوں میں شامل کیا۔ ہم خود بھی اس سنگین معاملے پر الیکشن کمیشن سے رجوع کر سکتے ہیں لیکن وہ خود پہلے ہی اس معاملے کو دیکھ رہے ہیں۔
انہوں نے کہا کہ عمران خان افغانوں کے بارے میں اس لیے بات کرتا ہے کیونکہ خیبرپختونخوا میں اس نے افغان شہریوں کو پاکستانی شناختی کارڈ بنوا کر دیئے اور جعلی لسٹیں تیار کی ہوئی ہیں۔ بیرون ملک بیٹھے بلاگرز کو عمران خان کی سابق اہلیہ جمائما پیسے دے رہی ہے، عمران خان کو ایک لابی فنانس کرنے کے ساتھ سپورٹ کر رہی ہے جس کے پیچھے مقاصد کچھ اور ہیں۔
انہوں نے کہا کہ آئندہ عام انتخابات 8 فروری سے پہلے ہو جائیں، چاہے 18 فروری کو ہو جائیں لیکن ہونے تو ہیں، آج ہو جائیں، کل ہوں یا پرسوں ہوں ۔ انتخابات کی تاریخ کے حوالے سے سوال پوچھے پر جواب میں کہا کہ آئندہ عام انتخابات کی تاریخ دینے کا یا آگے پیچھے کرنے کا اختیار صرف الیکشن کمیشن کے پاس ہے، میرے اختیار میں ایسا کچھ نہیں ہے نہ ہیں آپ کے اختیار میں ہے۔
انہوں نے کہا کہ الیکشن کمیشن آف پاکساتن آئین کے مطابق جو بھی کرنا چاہے کر سکتا ہے چاہے تو عام انتخابات 8 فروری سے پہلے کروا دے۔ میرے خیال میں اگر انتخابات کی تاریخ 8 سے 10 دن آگے بھی چلی جائے تو کوئی فرق نہیں پڑے گا، مگر اس سے زیادہ تاخیر نہیں ہونی چاہیے۔بلاول وزیراعظم بنے کا یا میں یہ وقت بتائے گا، شہبازشریف کو بھی نمبر میں نے پورے کر کے دیئے۔
آصف علی زرداری کا کہنا تھا کہ لاڈلہ وہ ہے جسے 25 سیٹیں ملنے کے باوجود اکثریت دلوائی جاتی ہے، اس کی حکومت بنوائی جاتی ہے جس کا وہ خود بھی اعتراف کرتے ہیں۔ لاڈلہ ہو یا لاڈلہ پلس وہ نوازشریف نہیں بلکہ عمران خان ہی ہے جو جیل میں بیٹھا ہے، اس کم ظرف نے اقتدار ملتے ہی ملک کا بیڑا غرق کر دیا اور اپنے فائدے کیلئے افغان شہریوں کو پاکستانی شناختی کارڈ دیئے اور ووٹرلسٹوں میں نام ڈالے۔
انہوں نے مزید کہا کہ عمران خان کے دوراقتدار میں جب تحریک عدم اعتماد لائی جا رہی تھی تو مجھے انہوں نے ایک دوست کے ذریعے پیغام بھجوایا تھا کہ آدھا عرصہ ہم حکومت کر لیتے ہیں، آدھا وقت آپ حکومت کر لیجئے گا۔ذوالفقار علی بھٹو کیس کو سماعت کیلئے مقرر کیے جانے پر چیف جسٹس کو مبارکباد پیش کرنا چاہتا ہوں۔