
طلباء کی زندگیوں میں نیا باب شروع ہونے جا رہا ہے، تعلیم آپشن نہیں ضرورت ہے: جنرل سید عاصم منیر
چیف آف آرمی سٹاف جنرل سید عاصم منیر شاہ نے آج نیشنل یونیورسٹی آف سائنس اینڈ ٹیکنالوجی (نسٹ) کے مین کیمپس میں منعقد ہونے والے سالانہ کانووکیشن میں شرکت کی۔ چیئرمین نسٹ بورڈ آف گورنرز آرمی چیف جنرل سید عاصم منیر شاہ نے نسٹ کے سالانہ کانووکیشن میں بطور مہمان خصوصی خطاب کرتے ہوئے کہا کہ تعلیم صرف ایک آپشن نہیں ہے بلکہ ہر نوجوان کی ضرورت ہے۔ طلباء پر فرض ہے کہ تعلیم حاصل کر کے ملک کے مسائل کا حل تلاش کریں۔
پاک فوج کے شعبہ تعلقات عامہ (آئی ایس پی آر) کی طرف سے جاری کیے گئے اعلامیہ کے مطابق آرمی چیف جنرل سید عاصم منیر نے کہا کہ طلباء کی زندگیوں میں آج سے ایک نیا باب شروع ہونے جا رہا ہے۔ تعلیم کوئی آپشن نہیں ہے بلکہ ضرورت ہے، طلباء کو چاہیے کہ ملک کو درپیش چیلنجز سے نپٹنے کے لیے اپنے فکری وسائل کو استعمال کریں ، ان پر فرض ہے کہ وہ ملک کو درپیش مسائل کا حل تلاش کریں۔
آرمی چیف جنرل سید عاصم منیر نے یونیورسٹی میں نمایاں کارکردگی کا مظاہرہ کرنے والے طالب علموں کو اعزازات دیئے اور طلباء سے خطاب میں کہا کہ اعلیٰ تعلیم حاصل کرنے والے طلباء کے لیے یہ دن تبدیلی سے زیادہ ذمہ داری کا تقاضا کرتا ہے۔ یونیورسٹی سے گریجوایٹ ہونے والے طلباء، ان کے اساتذہ اور والدین کو مبارکباد بھی دی۔
آرمی چیف نے نیشنل یونیورسٹی آف سائنس اینڈ ٹیکنالوجی کے کانووکیشن ویک میں پی ایچ ڈی، ماسٹرز اور بیچلرز کی تعلیم مکمل کرنے والے طالب علموں میں ڈگریاں تقسیم کرتے ہوئے فیکلٹی کو سیکھنے اور پڑھانے کیلئے سازگار ماحولیاتی نظام تیار کرنے پر یونیورسٹی کی تعریف بھی کی۔ نسٹ سے فارغ التحصیل ہونے والے 35 سو طلباء میں 7 مختلف ڈسپلنز میں ڈگریاں تقسیم کی گئیں۔
انہوں نے طلباء سے خطاب میں مزید کہا کہ طلباء کا فرض ہے کہ ملک کو درپیش مسائل کا پتہ لگا کر تجزیہ کریں اور اپنے فکری وسائل کو بروئے کار لاتے ہوئے ان کا حل تلاش کریں۔ آج طلباء کی زندگیوں میں جس نئے باب کا آغاز ہو رہا ہے وہ اہم تبدیلی کی نوید دیتا ہے۔ طلباء کی نئی ذمہ داری کو ان کی شخصیت اور آگے کے سفر میں ان کے انتخاب سے ظاہر ہونا چاہیے۔
- Featured Thumbs
- https://www.siasat.pk/data/files/s3/13اسیممئنیر تالعلعممسکجس.png