جرائم پیشہ افراد کا فیڈرل انویسٹی گیشن ایجنسی (ایف آئی اے) ملتان کے اہلکاروں کو یرغمال بنا کا تشدد کرنے کا واقعہ پیش آیا ہے۔ ذرائع کے مطابق ایف آئی اے ملتان کی ٹیم نے ضلع خانیوال کی تحصیل میاں چنوں کے علاقے اوڈکالونی میں غیرقانونی سرگرمیوں کی اطلاع ملنے کے بعد چھاپا مارا تو ملزمان نے ان پر دھاوا بول دیا۔
ملزمان نے ایف آئی اے اہلکاروں پر ڈیرے پر لے جا کر یرغمال بنانے کے بعد بیہمانہ تشدد کیا اور ان کی گاڑی کو توڑ پھوڑ کر کے نقصان پہنچایا۔
ذرائع کا کہنا ہے کہ ایف آئی اے ملتان کے 3 اہلکاروں پر مشتمل ٹیم نے غیرقانونی سرگرمیوں کی اطلاع ملنے پر ملزمان کو گرفتار کرنے کے لیے چھاپہ مارا تھا۔ ملزمان نے ایف آئی اے اہلکاروں کو ڈیرے پر لے گئے اور کئی گھنٹوں تک یرغمال بنا کر تشدد کرتے رہے، بعدازاں ایف آئی اے ٹیم کو پولیس نے ملزمان کے قبضے سے بازیاب کروایا۔
پولیس نے زخمی اہلکاروں کو ملزمان کے قبضے سے بازیاب کروانے کے بعد نشتر ہسپتال منتقل کروا دیا ہے جہاں ان کو طبی امداد دی جا رہی ہے۔ ڈائریکٹر ایف آئی اے ملتان خالد انیس نے اہلکاروں پر تشدد کے واقعے کا نوٹس لیتے ہوئے یقین دہانی کروائی ہے کہ واقعے میں ملوث ملزمان کے خلاف دہشت گردی کی دفعات کے تحت مقدمہ درج کروایا جائے گا۔
واقعے کی ویڈیوز سوشل میڈیا پر وائرل ہو رہی ہیں جن میں دیکھا جا سکتا ہے کہ ایف آئی اے اہلکاروں پر تشدد کیا جا رہا ہے۔ احمد حسن بوبک نامی سوشل میڈیا صارف نے ویڈیوز پر ردعمل میں لکھا: میاں چنوں موسی ورک کے قریب ایف آئی اے کا مبینہ چھاپہ، اوڈ برادرری جن کی ہم پکھی واس کے نام سے پکار کر تضحیک کرتے ہیں یہ برادری میاں چنوں میں کروڑوں اربوں پتی ہے ایف آئی اے نے ملزم خالد جو کہ مبینہ طور پر ہیکر بتایا جاتا ہے اس کی گرفتاری کے لیے ریڈ کیا تھا۔
اہلکاروں نے چادر چار دیواری کو پھلانگتے ہوئے خالد کو کروڑوں کی جعلسازی کے الزام میں گرفتار کر لیا، ایف آئی اے کی ٹیم مبینہ ملزم خالد کو لے کر روانہ ہوئی تو اوڈھ برادری مشتعل ہو کر پیچھے لگ گئی۔ اوڈوں نے ایف آئی اے کی ٹیم کو ملتان روڈ پر دھر لیا اور انکی گاڑی کو بھی توڑ پھوڑ دیا، گاڑی میں موجود تین مبینہ ایف آئی اے اہلکاروں کو اغوا کرلیا اور نامعلوم مقام پر لے گئے اور وہاں ان کو باندھ دیا اور تشدد کا نشانہ بنایا ایک اہلکار کی حالت نازک ہے!