عمران خان کا ایجنڈا ملک کو انارکی کی طرف دھکیلنا اور عدم استحکام کا شکار کرنا ہے ، افراتفری پیدا نہیں کرنے دیں گے: وزیر داخلہ
راولپنڈی میں مسلم لیگ ن کے ورکرز کنونشن سے صدر مسلم لیگ ن پنجاب ووزیر داخلہ رانا ثناء اللہ کا خطاب کرتے ہوئے کہنا تھا کہ مسلم لیگ ن انتخابات سے گھبرانے والی نہیں بلکہ اس کے لیے بھرپور تیاری کر رکھی ہے لیکن ہم چاہتے ہیں کہ پورے ملک میں انتخابات ہی وقت پر ہوں۔
پہلے میاں محمد نوازشریف اور مسلم لیگ ن نے ملک کو بحرانوں سے باہر نکالا اب بھی جو مشکلات درپیش ہیں انہیں نوازشریف کی قیادت میں جلد حل کر دیں گے۔
انہوں نے سابق وزیراعظم وچیئرمین پاکستان تحریک انصاف عمران خان کو مخاطب کرتے ہوئے کہا کہ :جیل بھرو تحریک" شروع کرو اس کے بعد تمہیں وہ جواب دیں گے جو تمہارے وہم وگمان میں بھی نہیں ہو گا۔ عمران خان کا ایجنڈا صرف اور صرف ملک کو انارکی کی طرف دھکیلنا اور عدم استحکام کا شکار کرنا ہے لیکن اسے ملک میں افراتفری پیدا نہیں کرنے دیں گے۔
رانا ثناء اللہ کا کہنا تھا کہ اپنے کارکنوں کو جیل بھرو تحریک کا کہہ کر خود بینکر میں چھپ کر بیٹھا ہوا ہے، ہم ان تمام افراد کو جیلوں میں بند کر دیں گے جو ملک کو افراتفری کا شکار کرنا چاہتے ہیں۔ عمرانی ٹولے کے بدبختوں کو جیلوں میں رکھیں گے جن کا مقصد ملک کو نقصان پہنچانا ہے سیاسی کارکنوں کو نہیں۔
انہوں نے صدر مملکت پر تنقید کرتے ہوئے کہا کہ ایسی مسکین شکل ہے جیسے بھیک مانگے گا۔ عارف علوی نے آرڈیننس پر دستخط اس لیے نہیں کیے کہ کہیں پاکستان اور آئی ایم ایف میں ڈیل طے نہ ہو جائے۔
دریں اثنا وزیر داخلہ رانا ثناء اللہ کے خلاف عدلیہ کو سکینڈلائز کرنے کے حوالے سے شاہد رانا ایڈووکیٹ کی طرف سے توہین عدالت کی درخواست دائر کر دی گئی ہے۔ درخواست میں موقف اختیار کیا گیا کہ لائیو پریس کانفرنس کرتے ہوئے وزیر داخلہ نے صدر سپریم کورٹ بار اور سابق وزیراعلیٰ پنجاب کی آڈیو لیک کی جس کا مقصد عدلیہ کو سکینڈلائز کرنا تھا لہٰذا غیرآئینی اقدام پر رانا ثناء اللہ کے خلاف توہین عدالت کی کارروائی کی جائے۔
