نگراں وزیراعظم انوارالحق کاکڑ نے گلگت بلتستان میں گفتگو کرتے ہوئے کہا کہ مٹھی بھر عناصر کو پورے معاشرے کو یرغمال بنانے کی اجازت نہیں دیں گے،بلکہ حکمت اور ہمت سے غلط فہمیوں کا خاتمہ کیا جائے گا۔
تفصیلات کے مطابق نگراں وزیراعظم انوارالحق کاکڑ نے گلگت بلتستان میں امراض قلب کے اسپتال میں او پی ڈی کا افتتاح کیا ، اس موقع پر انہوں نے صحافیوں سے گفتگو کی اور کہا کہ ترجیحی بنیادوں پر قانون کی عملداری اور آئینی طریقے کو اپناتے ہوئے گلگت بلتستان کے لوگوں کے مسائل حل کیے جائیں گے۔
انہوں نے کہا کہ قائداعظم کا پاکستان کیلئے جو وژن تھا اس کا عملی نمونہ ہمیں جی بی میں نظر آتا ہے، یہ علاقہ مختلف رنگ و نسل کے لوگوں کا گلدستہ ہے، مختلف نقطہ نظر رکھتے ہوئے مل جل کر زندگی بسر کرنا انسانیت کی معراج ہے، ملک میں ایک قوم ، ایک قانون اور صرف پاکستان کے نعرے کی ہی گنجائش ہے، کسی کو کسی اور سے کوئی امید یا غلط فہمی یا خوش فہمی ہے تودور کرلے، کوئی یہ سمجھتا ہے کہ یہاں کے بھائی چارے کو نقصان پہنچایا جاسکتا ہے تو یہ اس کی بڑی غلط فہمی ہے۔
نگراں وزیراعظم نے کہا کہ اگر کوئی غلط فہمیاں پیدا ہوئی بھی ہیں تو ہم انہیں حکمت اور ہمت سے دور کریں گے،یہاں کے مسائل ہر ممکن حد تک حل کرنے کی کوشش کریں گے،یہاں تک کہ یہاں کے لوگ اپنے پیروں پر کھڑے ہوجائیں اور پروقار زندگی بسر کرسکیں اور انہیں اپنی شناخت کے حوالےسے سوالات کے آئینی جوابات مل جائیں۔