شیخ رشید نے کہا کہ یہ حکومت غیرملکی دوروں میں اپنی کمپنی کی مشہوری کے علاوہ کچھ نہیں کر رہی، پچھلے ڈیڑھ مہینے سے بلاول پاکستان سے باہر ہے۔ سازش سے آئی حکومت لوگوں کو بیوقوف نہیں بنا سکتی۔
عوامی مسلم لیگ کے سربراہ شیخ رشید نے اپنے بیان میں کہا کہ ملک میں بارہ گھنٹے کی لوڈ شیڈنگ ہے، مہنگائی اور بے روزگاری سیاسی طور پر ان کو لے ڈوبے گی، ثابت ہوگیا کہ یہ انٹرنیشنل بھکاری ہیں اور وقت آنے پر اپنے کپڑے بیچنے کا دعوی کر رہے ہیں جن کپڑوں کا کے پی کے میں کوئی خریدار نہیں۔
سابق وزیر داخلہ نے کہا کہ ایک ووٹ کی اکثریت قائم رکھنے کے لیے آصف زرداری دربدر دھکے کھا رہا ہے۔ ملک میں بارہ گھنٹے کی لوڈ شیڈنگ ہے، مہنگائی اور بے روزگاری سیاسی طور پر ان کو لے ڈوبے گی، ثابت ہوگیا کہ یہ انٹرنیشنل بھکاری ہیں۔
انہوں نے حکومت پر طنز کے نشتر برساتے ہوئے کہا یہ وقت آنے پر اپنے کپڑے بیچنے کا دعوی کر رہے ہیں جن کپڑوں کا کے پی کے میں بھی کوئی خریدار نہیں۔ ساری دنیا کو پتہ ہے بوٹ پالش کرنے والوں کی عوام میں کیا حیثیت ہے۔
شیخ رشید نے یہ بھی کہا کہ ایک نے اپنا بیٹا وزیرخارجہ لگایا ہوا ہے دوسرے نے چیف منسٹر اور تیسرے نے وزیر مواصلات۔ لوگ کھائیں دھکے اور لوڈشیڈنگ میں گزارا کریں۔ میں اوورسیز پاکستانیوں کے ووٹ کی خاطر سپریم کورٹ جا رہا ہوں۔
انہوں نے کہا مجھے یقین ہے کہ 31 کروڑ ڈالر سالانہ پاکستان بھیجنے والے کسی بھی پاکستانی سے کم محب وطن نہیں ہیں اور ان کا ووٹ پر پہلےحق ہے، ساری سامراجی طاقتیں موجودہ حکومت کے پیچھے کھڑی ہوجائیں لیکن اس حکومت کو نہیں بچا سکتیں یہ انتشار اور خلفشار زدہ حکومت اپنی قبر خود کھود کر رہے گی۔
