مشہور مصنف اور ڈرامہ رائٹر خلیل الرحمان قمر نے سوشل میڈیا صارفین سے اپیل کی ہے کہ خاور مانیکا کا موازنہ "دانش" سے نا کیا جائے۔
تفصیلات کے مطابق چیئرمین پی ٹی آئی عمران خان کی اہلیہ بشریٰ بی بی کے سابقہ شوہر خاور مانیکا کے چند روز قبل دیئے گئے ایک انٹرویو نے سوشل میڈیا پر ایک نا رکنے والی بحث چھیڑ رکھی ہے جس میں لوگ نت نئے تبصرے کررہے ہیں۔
اس دوران کچھ لوگوں نے خاور مانیکا کا موازنہ پاکستان کے مشہور ڈرامہ سیریل "میرے پاس تم ہو" کے مرکزی کردار دانش سے بھی کیا اور خاور مانیکا کو دانش قرار دیا۔
سوشل میڈیا پر اس بحث پر مذکورہ ڈرامہ کے مصنف خلیل الرحمان قمر چپ نا رہ سکے اور انہوں نے لوگوں سے اس موازنے کو روکنے کی درخواست کرتے ہوئے سماجی رابطے کی ویب سائٹ پر ایک پیغام جاری کیا۔
خلیل الرحمان قمر کا کہنا تھا کہ براہ کرم دانش کا موازنہ خاور مانیکا سے نا کیا جائے، اس سے دانش کی روح کو تکلیف ہوتی ہوگی، دانش نے اپنی بیوی کو چھوڑ دینے کے بعد بھی اس کے خلاف کبھی کوئی بات نہیں کی تھی۔
خیال رہے کہ میرے پاس تم ہو ڈرامے میں دانش نامی ایک شخص کی بیوی امیر شخص کی محبت میں گرفتار ہوکر اپنے شوہر سے طلاق لے لیتی ہے اور دانش اپنی بیوی کی خوشیوں کو دیکھتے ہوئے اسے بخوشی طلاق دے دیتا ہے۔