
خیبر پختونخوا میں فوجی تنصیبات پر حملہ کرنے والےا ور عسکری املاک کو نقصان پہنچانے والے 16 شرپسندوں کے مقدمات فوجی عدالتوں میں چلائے جانے کا فیصلہ کرلیا گیا ہے۔
تفصیلات کے مطابق مردان، مالاکنڈ،دیر اور بنوں سمیت خیبر پختونخوا کے مختلف علاقوں سے گرفتار شر پسندوں کے خلاف مقدمات فوجی عدالتوں میں چلانے کا فیصلہ کرلیاگیا ہے، ان شرپسندوں نے 9 مئی کو عمران خان کی گرفتاری کے بعد مظاہروں کے دوران فوجی تنصیبا ت پر حملے کیے، عسکری املاک کو نقصان پہنچایا اور شہداء کی تحقیر کی تھی۔
رپورٹس کے مطابق مردان میں کرنل شیر خان شہیداور دیگر شہداء کے مجسموں کی بے حرمتی کرنے والوں کے خلاف مقدمات کو فوجی عدالتوں میں چلانے کا فیصلہ ہوا ہے، مردان کی انسداد دہشتگردی کی عدالت نے گرفتار ملزمان پر آرمی ایکٹ اور سیکرٹ آفیشل ایکٹ کے تحت مقدمات چلانے کی درخواست منظور کرلی ہے۔
مردان میں گرفتار ملزمان میں عدنان، شاہ زیب، رحمت اللہ،یاسرنواز، شاکر اللہ سید عالم شامل ہیں جن کے خلاف آرمی کورٹس میں مقدمات چلائے جائیں گے، مردان پولیس نے ان شرپسندوں کو مختلف علاقوں سے گرفتا ر کیا تھا۔
سرکاری حکام کے مطابق اب تک 16 شرپسندوں کے کیسز فوجی عدالتوں میں چلائے جانے کی منظور ی دی جاچکی ہے، مردان کے علاوہ مالاکنڈ سے چار، بنوں اور دیر سے تین تین ملزمان کو فوجی تنصیبات پر حملے، عسکری املاک کو نقصان پہنچانے کے الزام میں گرفتار کیا گیا تھا اور اب کے مقدمات فوجی عدالتوں میں چلائے جائیں گے۔
- Featured Thumbs
- https://www.siasat.pk/data/files/s3/14ddcdddf.jpg