کراچی سے لاپتہ ہونے والی دعازہرہ کی عمر کے تعین کے حوالے سے میڈیکل ٹیسٹ میں اہم انکشافات سامنے آگئے ہیں۔
خبررساں ادارے کی رپورٹ کے مطابق کراچی کے علاقے گرین ٹاؤن سے لاپتہ ہوکر لاہور میں اپنے دوست سے شادی کرنےو الی دعا زہرہ کو کراچی پہنچانے کے بعد اس کا میڈیکل کروالیا گیا ہے جس کی رپورٹ سامنے آگئی ہے۔
رپورٹ میں دعا زہرہ کی عمر کا تعین بھی کرلیا گیا ہے جس کے مطابق دعا زہرہ 16 سے 17 برس کے درمیان کی عمر کی ہیں، میڈیکل رپورٹ کل عدالت میں پیش کی جائے گی۔
واضح رہے کہ عدالت میں دعا زہرہ لاپتہ کیس کی سماعت کے دوران جج نے دعا کی عمر کے تعین کیلئے میڈیکل کروانےکا حکم دیا تھا جس کے بعد شعبہ تفتیش کے مطابق دعا زہرہ کے بون ٹیسٹ اور دیگر ٹیسٹ کیے جائیں گے، دعا کے تمام ٹیسٹ سول اسپتال میں کیے گئے۔
واضح رہے کہ کراچی سے لاپتہ ہونے والی دعا زہرہ اور اس کے شوہر ظہیر احمد کو پولیس نے پنجاب کے شہر بہاولنگر سے گرفتار کرکے کراچی منتقل کیا تھا جس کے بعد عدالت نے دعا کو شیلٹر ہوم بھیجنے کا حکم دیا تھا۔