استحکام پاکستان پارٹی کے چیئرمین جہانگیر ترین کے الیکشن میں شکست کے بعد پارٹی عہدے سے مستعفیٰ اور سیاست سے کنارہ کشی کے اعلان کے بعد سوشل میڈیا پر تبصروں کا سلسلہ شروع ہوگیا ہے۔
تفصیلات کے مطابق سینئر سیاستدان اور آئی پی پی کے چیئرمین جہانگیر ترین نے سماجی رابطے کی ویب سائٹ ایکس پر جاری اپنے بیان میں سیاست سے کنارہ کشی اور پارٹی چیئرمین شپ سے مستعفیٰ ہونے کااعلان کرتے ہوئے کہا کہ میں اللہ کے فضل سے نجی شعبے میں رہتے ہوئے ملک کی جس حد تک ہوسکا خدمت کرتا رہوں گا۔
جہانگیر ترین کے اس اعلان پر سیاستدانوں، صحافیوں اور سوشل میڈیا صارفین نے ملے جلے ردعمل کا اعلان کیا، کسی نے جہانگیر ترین پر طنز کے تیر برسائے تو کسی نے ان کے مستقبل کیلئے نیک خواہشات کا اعلان کیا تو کسی نے ان کے سیاسی کردار پر تنقید کی۔
جہانگیر ترین کے اس فیصلے پر آئی پی پی کے صدر عبدالعلیم خان نے دکھ کا اظہار کرتے ہوئے کہا کہ جہانگیر ترین ہمیشہ آئی پی پی کے سرپرست اعلیٰ رہیں گے، ان کا کسی بھی حکومت میں ہونا اس حکومت کیلئےاعزاز کی بات ہے، میں بطور چھوٹا بھائی اور آئی پی پی صدر کی حیثیت سے انہیں خراج تحسین پیش کرتا ہوں۔
صحافی واینکر طارق متین نے طنزیہ انداز اپناتے ہوئے کہا کہ آپ نے عمران خان کو وزیراعظم بنوایا تھا، اگلا وزیراعظم بھی بنواکر جائیں، کچھ لوگ اغوا بھی کیے جاسکتے ہیں۔
سینئر صحافی وپروڈیوسر عدیل راجا نے کہا کہ یہ عمران خان کی طاقت ہے، جس شخص نے ان کی پارٹی توڑی، ان کے خلاف گھٹیا سیاست کی، آج خود ہی سیاست سے کنارہ کشی کررہا ہے، تاہم بھی ان کے گزشتہ دوسالوں میں گندے سیاسی کردار کو بھی بھولنا نہیں چاہیے۔
صحافی و اینکر رابعہ انعم نے جہانگیر ترین کو خداحافظ کہتے ہوئے کہا کہ آپ کی سیاست اس ملک کیلئے شرمندی کا سبب بنی ہے،آپ نے اپنی دولت کو انتخابی سیاست کو توڑنے مروڑنے میں استعمال کی، لوگوں کو رشوت دی،اپنے فائدے کیلئے لوگوں کو مجبور کیا، آپ نے اپنے ہی لوگوں کو بلیک میل کیا اور اپنے فائدے کیلئے کرپٹ قسم کی ڈیلز کی تاکہ اپنے آپ کو اپنے کاروبار کو تحفظ مل سکے، تاہم لوگوں نے آخر میں آپ کو مسترد کردیا۔
ابوذر سلمان نیازی نے کہا کہ یہ ہے لوگوں کی طاقت جو بیلٹ کے ذریعے سامنے آئی جس نے ایک اخلاقی اور ذہنی دھچکا چھوڑا ہے۔
شاعرہ نوشی گیلانی نے کہا کہ اگر عمران خان کو دھوکہ دیئے بغیر اور بشریٰ بی بی کے قصے سنائے بغیر رخصت ہوتے تو آپ کی کچھ عزت ضرور ہوتی ، تاہم آپ بدقسمت نکلے۔
صحافی عمر دراز گوندل نے کہا کہ دوسروں سے پریس کانفرنس کرواکے ان کی سیاست کا بیڑہ غرق کرنے والے خود بغیر پریس کانفرنس کیے ہی سیاست چھوڑ گئے۔
صحافی عمران افضل راجا نے جہانگیر ترین کے فیصلے کو سراہتے ہوئے کہا کہ کاش آپ وہ عزت اور مقام برقرار رکھ سکتے جو بطور عمران خان کے دوست عوام نے آپ کو دیا تھا۔
وقار ملک نے کہا کہ بڑا شخص ہوتا تو اغوا برائے بیان بازی کی سہولت کاری پر قوم سے معافی مانگتا ، عوام کو حقائق بتاتا ، راہ فرار بزدلوں کا شیوہ ہے۔
ارم ضعیم نے کہا کہ آپ کا فیصلہ اچھا ہے، مگر یہ یادرکھا جائے گاکہ کیسے آپ نے عمران خان کی پارٹی اورسیاست ختم کرنے کیلئے تمام اقدامات کیے، لوگ توڑے ، غیر سیاسی قوتوں کو اپنا کندھا فراہم کیا اور جب عوام نے مسترد کردیا تو آپ کو اخلاقیات یاد آگئیں۔
نمرہ نامی صارف نے جہانگیرترین کےمقابلے میں جیتنے والے امیدوار کی تصویر شیئر کرتے ہوئے کہا کہ امیدوار ایسا کھڑا کرو کہ سامنے والا سیاست ہی چھوڑ دے۔
- Featured Thumbs
- https://www.siasat.pk/data/files/s3/ترریمپچچففھج.png
