
وزیراعظم عمران خان کی زیر صدارت تحریک انصاف کی سینٹرل ایگزیکٹو کمیٹی (سی ای سی) کے اجلاس کی اندرونی کہانی سامنے آگئی، وزیراعظم نے ذاتی حملوں پر مشتمل مہم کو گھٹیا اور نا قابل برداشت قرار دیتے ہوئے واضح پیغام دیا کہ اتحادی ہمارے ساتھ ہیں کہیں نہیں جارہے۔
تفصیلات کے مطابق وزیراعظم کے زیر صدارت پی ٹی آئی کی سینٹرل ایگزیکٹو کمیٹی کا اجلاس ہوا جس میں بلدیاتی انتخابات اور سیاسی حکمت عملی پر غور کیا گیا۔
عمران خان کا کہنا تھا کہ بلدیاتی انتخابات کےدوسرے مرحلے میں بہترین نتائج کیلئے کوشش کریں۔
وزیراعظم نےواضح پیغام دیا کہ اتحادی پارٹیاں ہمارے ساتھ ہیں کہیں نہیں جا رہیں، انہوں نے پارٹی رہنماوَں کو ہدایت کی کہ اپوزیشن کے بیانیے کا مقابلہ کارکردگی سے کریں، ڈیمز، ہیلتھ کارڈ، احساس اورکامیاب جوان پروگرام کی کامیابیوں پر بات کریں، فلاحی منصوبوں سے متعلق حکومتی اقدامات کوعوامی سطح پر اجاگر کریں۔
اس موقع پر وزیراعظم عمران خان نے ذاتی حملوں پر مشتمل مخصوص مہم پر اظہار ناراضی کرتے ہوئے کہا کہ ذاتی حملوں پر مشتمل مہم گھٹیا اور نا قابل برداشت ہے، مادرپدر آزادی خطرناک ہے، ایسے رجحان کی حوصلہ شکنی کرنا ہوگی۔
واضح رہے کہ اس سے قبل ایک تقریب سے خطاب میں وزیراعظم عمران خان نے چوہدری برادران پر مکمل اعتماد کا اظہار کرتے ہوئے کہا تھا کہ پی ٹی آئی کی سخت تربیت کی ہے، وہ گھبراتے نہیں، ان کا کہنا تھا کہ جو گھبرائے ہوئے ہیں انہیں اب چوہدری شجاعت کی صحت کاخیال آگیا، گھبرائےہوئےلوگ بیس بیس سال پرانی فوتگی کی دعا کیلئے بھی جارہے ہیں۔
- Featured Thumbs
- https://www.siasat.pk/data/files/s3/10pmikzaatihamly.jpg