اسپیکر قومی اسمبلی راجا پرویز اشرف کے بھائی راجا جاوید کیجانب سے پولیس افسر کے ساتھ تضحیک آمیز رویے کی ویڈیو سوشل میڈیا پر وائرل ہوگئی ہے۔
تفصیلات کے مطابق سوشل میڈیا پر ایک ویڈیو وائرل ہوئی ہے جس میں اسپیکر قومی اسمبلی راجا پرویز اشرف کے بھائی راجہ جاوید ایک جلسے کے دوران حاضر سروس چوکی انچارج سب انسپکٹر کو اسٹیج پر انتہائی تضحیک آمیز رویے سے طلب کرتے ہیں اور لوگوں کی طرف منہ کرکے کھڑے ہونے کی ہدایات کرتے ہیں۔
راجہ جاوید لوگوں سے کہتےہیں کہ میں نے اس پولیس والے کو یہاں چوکی انچارج لگایا ہےاور میں نے اسے کہا ہے کہ اگر کوئی جھوٹا مقدمہ درج ہوا تو میں یہ سارے اسٹار اتاردوں گا۔
ویڈیو وائرل ہونے کے بعد سوشل میڈیا پر صارفین نے راجہ جاوید کے انداز بیان اور پولیس اہلکار سے گفتگو کے انداز کو شدید تنقید کا نشانہ بنایا اور سی پی او راوولپنڈی سے معاملےکا نوٹس لینے کا مطالبہ کرتے ہوئے کہا کہ اپنی پوسٹنگ بچانے کیلئے اپنی غیرت فروخت نا کریں۔
صارفین کے شدید ردعمل اور ویڈیو سوشل میڈیا پر وائرل ہونے کے بعد راجہ جاوید نے اشرف نے پنجاب پولیس سے معذرت کرتے ہوئے کہا کہ سیاسی تقاریر کےد وران فرط جذبات میں اکثر ایسے الفاظ ادا ہوجاتے ہیں،شہداء کی سرزمین گوجر خان کے رہائشی وردی کا احترام کرتے ہیں، چوکی انچارج اور ایس ایچ او میرے بھائی ہیں۔
