وفاقی وزیر داخلہ رانا ثناءاللہ نے افغانستان سے متعلق ملک دشمن کے الفاظ استعمال کرنے پر وضاحتی بیان جاری کردیا ہے۔
مائیکروبلاگنگ ویب سائٹ ٹویٹر پر اپنے ویڈیوبیان میں راناثناءاللہ کاکہنا تھا کہ میری پریس کانفرنس میں نے کہا تھا کہ " جس طرح پاکستان کی ریاست پرعمران خان نے الزامات لگائے ہیں اور خاص طورپر جوافغانستان میں ڈرون حملہ ہوا ، ایسے الزاما ت توکسی دشمن ملک اور افغانستان نے بھی نہیں لگائے"۔
راناثناء اللہ نے کہاکہ کسی وجہ سے لفظ "اور" یا توکٹ گیا یاسلپ ہوگیا اسی لیے میں وضاحت کرنا چاہتا ہوں کہ افغانستان ہمارا اسلامی برادر ملک ہے، ہمارا دوست ملک ہے اورہمارا افغانستان سے دیرینہ تعلق ہے۔
واضح رہے کہ رانا ثنااللہ نے ایک پریس کانفرنس کے دوران خطاب کرتے ہوئےکہا تھاکہ جیسے الزامات عمران خان نے ریاست پر لگائےہیں ایسےالزامات کسی دشمن ملک افغانستان نے بھی نہیں لگائے۔
وفاقی وزیر کی جانب سے افغانستان کو دشمن ملک قرار دینے کے اس غیر ذمہ دارانہ بیان پر سیاسی حلقوں اور عوام کی جانب سے شدید ردعمل سامنے آیا جس کے بعد رانا ثناء اللہ نے اس معاملے پر وضاحت جاری کی۔