سابق وزیر مملکت داخلہ شہریار آفریدی کو رانا ثنااللہ سے برآمد ہونے والی منشیات اور اس کیس پر کس نے بریف کیا فواد چودھری نے بتا دیا۔
نجی چینل آج نیوز کے صحافی یونس خان نے شہریار آفریدی سے سوال کیا کہ انہوں نے جس ویڈیو اور ثبوتوں کی بات کی تھی وہ اب تک عدالت میں پیش کیوں نہیں ہوئے جس پر شہریار آفریدی نے کہا کہ تمام ثبوت عدالت کے سامنے رکھ دیئے جائیں گے آپ خدا کیلئے کیس کا میڈیا ٹرائل بند کریں۔
اس بات چیت کی ویڈیو کے ساتھ یونس خان نے تبصرہ کیا کہ شہریار آفریدی نے جھوٹی قسم اٹھائی اپنی جھوٹی سیاست کے لیے قرآن اور اسلام کے نام کو بھی استعمال کیا ۔ اب سوال یہ ہے کہ 15 کلو ہیروئن کا مالک کون تھا ؟ اس کا جواب شہریار سے بنتا ہے ۔ آفریدی سے اقوام متحدہ کے ہیڈ کوارٹر میں رانا ثنا اللہ کے حوالے سے سوال کیا اسکا جواب بھی سنیں۔
اسی ٹویٹ پر تبصرہ کرتے ہوئے حامد میر نے کہا کہ افسوس اس بات کا ہے ان صاحب کو پتہ تھا وہ جھوٹے ہیں لیکن وہ بڑے اعتماد کے ساتھ جھوٹ بول رہے تھے اب تو ان کے ساتھی فواد چودھری نے بھی موصوف کو بے نقاب کر دیا ہے شہر یار آفریدی مت بھولیں کہ جان تو اللّٰہ کو دینی ہے اللّٰہ سے ڈریں اور بتا دیں کہ انہیں جھوٹ بولنے پر کس نے مجبور کیا۔
حامد میر نے فواد چودھری کا ذکر کیا تو ان سے بھی نہ رہا گیا اور بولے کہ شہریار آفریدی اور وزیر اعظم ہاؤس کو دی جانیوالی بریفنگز میں بار بار بتایا گیا کہ رانا ثناآللہ سے ہیروئن برآمد ہوئی اور اس کے تمام ثبوت موجود ہیں، شہریار آفریدی اپنے محکمے کی طرف سے فراہم کردہ معلومات پر بات کر رہے تھے اور انہیں اب بھی یقین ہے کہ کیس درست ہے۔