کراچی پولیس چیف غلام نبی میمن نے دعویٰ کیا ہے کہ چینی اساتذہ کے حوالے سے انٹیلی جینس رپورٹ تھی۔ نجی چینل جیو کے پروگرام "آج شاہ زیب خان زادہ" کے ساتھ میں بات کرتے ہوئے انہوں نے کہا کہ اسی لیے چینی اساتذہ کو سیکیورٹی بھی دی گئی تھی۔
غلام نبی میمن نے کہا کہ خاتون کو استعمال کرکے خودکش حملہ کیا جائے گا یہ اطلاع نہیں تھی۔ کراچی یونیورسٹی کی طالبہ کو استعمال کیا گیا، بارودی مواد اندر کیسے پہنچا، اس حوالے سے تحقیقات کررہے ہیں۔
دوسری جانب جامعہ کراچی کے اندرونی معاملات سے متعلق میڈیا رپورٹس میں دعویٰ کیا جا رہا ہے کہ یونیورسٹی میں عبوری مدت کے لیے آئی قائم مقام انتظامیہ نے ڈیڑھ ماہ کے اندر خالد عراقی دور کے تمام اعلیٰ و کلیدی عہدوں پر تعینات افسران کو فارغ کرکے اپنے منظور نظر افراد کو تعینات کردیا تھا۔
جامعہ کے اہم ترین شعبہ (سیکورٹی ایڈوائزر) پروفیسر معیز کو ہٹا کرمن پسند افسر پروفیسر زبیر کو سیکورٹی ایڈوائزر تعینات کر دیا گیا۔حملے کے وقت پروفیسر زبیر اپنے آبائی علاقے بہاولپور میں تھے۔ پروفیسر زبیر نے سیکورٹی کے معاملے پر خود کو بری الزمہ کرنے کیلئے معاملہ چینی کنفیوشس انسٹیٹیوٹ کے ڈائریکٹر کے سر ڈال دیا۔
اطلاعات کے مطابق کنفیوشس انسٹیٹیوٹ کے 2 ڈائریکٹر ہیں ، جن میں ایک پاکستانی و جامعہ کے ذمہ دار جبکہ دوسرے منتظم کا تعلق چین سے تھا۔ پاکستانی ڈائریکٹر کنفیوشس انسٹیٹیوٹ نے سیکورٹی ایڈوائزر پروفیسر زبیر کو خط لکھا کہ چینی اساتذہ کی سیکورٹی کو فول پروف بنایا جائے۔
جواب میں ڈاکٹر محمد زبیر نے 31 مارچ کو کنفیوشس انسٹیٹیوٹ کے ڈائریکٹر کے نام ایک خط لکھا جس میں خود کو بحیثیت سیکورٹی انچارج بری الزمہ قرار دیتے ہوئے لکھا تھا کہ کنفیوشس انسٹیٹیوٹ کے چینی اساتذہ جامعہ کراچی کے گیسٹ ہاؤس اور انسٹیٹیوٹ سے بغیر رینجرز وپولیس کی سیکورٹی کے باہر آتے جاتے ہیں اور اگر اس حوالے سے کوئی نقصان ہوا تو جامعہ کراچی اس کی ذمہ دار نہیں ہو گی۔
6 اپریل کو کنفیوشس انسٹیٹیوٹ کے پاکستانی ڈائریکٹر ڈاکٹر محمد ناصر نے ایڈوائزر سیکورٹی ڈاکٹر محمد زبیر کو خط لکھ کر کہا تھا کہ بحیثیت پاکستانی آپ اور ہم سمجھتے ہیں کہ پاک چین دوستی بہت بلند ہے اس لئے چینی انسٹیٹیوٹ کے اساتذہ کی سیکورٹی و حفاظت کرنا ہماری اولین ترجیح ہے۔
واضح رہے کہ گزشتہ روز جامعہ کراچی میں خودکش بم دھماکے میں چینی باشندوں کی وین کو نشانہ بنایا گیا، جس کے نتیجے میں 3 چینی باشندوں سمیت 4 افراد ہلاک اور 3 زخمی ہوئے۔