پاکستان کرکٹ ٹیم کے ترجمان نے سرفرازاحمد اور سعود شکیل کے درمیان لفظی تکرار کے معاملے پر وضاحتی بیان جاری کردیا ہے۔
تفصیلات کے مطابق آسٹریلیا میں جاری پاک آسٹریلیا ٹیسٹ سیریز کے شروع ہونے سے قبل ہی قومی ٹیم ایک تنازعہ کا شکار ہوگئی ہے، دواہم کھلاڑیوں کے درمیان ہونے والی لفظی تکرار کی ویڈیو سوشل میڈیا پر وائرل ہوگئی ہے۔
یہ ویڈیو سیریز کے شروع ہونے سے قبل کینبرا میں قومی ٹیم کے پریکٹس سیشن کی ہے جس میں سعود شکیل نے سرفراز احمد سے ہے کہ"میں کب تک کام آؤں گا"، سرفراز احمد نے جواب دیا کہ" بھائی پہلی بات یہ ہے کہ میں نے آپ کو کوئی کام کہا ہی نہیں، آپ میرے کوئی کام نہیں آؤ گے"۔
لفظی تکرار کی مبینہ ویڈیو سوشل میڈیا پر وائرل ہونے اور سوشل میڈیا صارفن کی جانب سے شدید ردعمل سامنے آنے کے بعد ترجمان قومی کرکٹ ٹیم نے ایک وضاحتی بیان دیا اور کہا کہ وائرل ویڈیو سے متعلق یہ قیاس آرائیاں کہ دونوں کھلاڑیوں میں لفظی تکرار ہوئی ہے بالکل غلط ہے۔
انہوں نے مزید کہا کہ ان خبروں میں بالکل صداقت نہیں ہے، دونوں کھلاڑیوں میں ہونے والی گفتگو مذاق کی تھی، دونوں فزیو اور ٹرینرز کے بارے میں بات کررہے تھے، دونوں کھلاڑیوں کے درمیان احترام والا رشتہ ہے، کھلاڑیوں میں اختلافات کی خبریں بے بنیاد ہیں۔
خیال رہے کہ دورہ آسٹریلیا میں پاکستان اور آسٹریلیا کی ٹیموں کے مابین تین ٹیسٹ میچ کھیلے جائیں گے، پہلا ٹیسٹ پرتھ، دوسرا میلبرن اور تیسرا3 جنوری کو سڈنی میں سیریز کا آخری میچ کھیلا جائے گا۔