پاکستان میں انٹرنیٹ کی سست رفتاری کے باعث فری لانسنگ، ای کامرس، اور آئی ٹی انڈسٹری شدید متاثر ہو رہی ہے، اور یہ صورتحال نہ صرف معیشت پر بلکہ عام لوگوں کی زندگیوں پر بھی گہرا اثر ڈال رہی ہے۔
انٹرنیٹ کی خرابی سے روزگار کے مواقع ختم ہو رہے ہیں، جبکہ کئی گھروں کے مالی حالات مزید خراب ہو رہے ہیں۔
انٹرنیٹ کی سست رفتاری کے باعث فری لانسرز کے آرڈرز منسوخ ہو رہے ہیں، جس کی وجہ سے ان کے اکاؤنٹس معطل ہو رہے ہیں، اور بین الاقوامی کلائنٹس کا اعتماد مجروح ہو رہا ہے۔
سست انٹرنیٹ نے ای کامرس بزنس پر بھی بہت برا اثر ڈالا ہے، ہزاروں آرڈرز روزانہ کینسل ہو رہے ہیں، جس سے مقامی اور بین الاقوامی کاروبار پر منفی اثر پڑ رہا ہے۔
انٹرنیٹ کی سست رفتاری اور بندش سفید پوش دیہاڑی داروں کیلئے بھی مشکلات کا باعث بننے لگی۔ آن لائن ٹیکسی ڈرائیورز بھی سست انٹرنیٹ کا شکوہ کرتے نظر آرہے ہیں۔
ای کامرس اورآئی ٹی ایکسپرٹ سلمان حبیب کا کہنا تھا کہ آئی ایکسپورٹ بہت کم ہوگئی ہے اور قوم کی کئی برسوں کی محنت پر پانی پھر گیا جبکہ ای کامرس ایکسپرٹ عمیر اعجاز کہتے ہیں کہ انٹرنیٹ سلو ہونے سے پاکستانیوں کے روزانہ ہزاروں آرڈرز کینسل ہورہے ہیں ۔
معروف وی لاگر حافظ احمد کا کہنا ہے کہ آن لائن بزنس کی طرف لوگ آرہے تھے لیکن حالیہ عرصے میں انٹرنیٹ کی بندش، رفتار میں کمی کی وجہ سے بہت نقصان، جو کسر رہ گئی تھی وہ فائر وال نے نکال دی، اعلیٰ عہدوں پر بیٹھے لوگ ای کامرس کو سمجھتے ہی نہیں۔
حکومت کا تو یہ دعویٰ ہے کہ آئی ٹی برآمدات بڑھ رہی ہیں جبکہ حقیقت اسکے برعکس ہے، آئی ٹی سیکٹر کی برآمدات میں کمی آ رہی ہے، اور پچھلے کئی سالوں کی محنت ضائع ہونے کے خدشات بڑھ رہے ہیں۔
سست انٹرنیٹ نے لوگوں کو اعصابی دباؤ کا شکار کر دیا ہے، جبکہ آن لائن تعلیم اور دیگر روزمرہ کے کام بری طرح متاثر ہو رہے ہیں۔
ماہرین کے مطابق، اگر حکومت اس مسئلے کو سنجیدگی سے نہیں لے گی تو پاکستان کی ڈیجیٹل معیشت مزید زوال پذیر ہو سکتی ہے۔ فوری اقدامات کی ضرورت ہے تاکہ انٹرنیٹ کی سروس کو بہتر بنایا جا سکے اور انڈسٹری کو دوبارہ مستحکم کیا جا سکے۔
- Featured Thumbs
- https://www.siasat.pk/data/files/s3/in1h12.jpg
