سابق وزیر داخلہ شیخ رشید نے دعویٰ کیا ہے کہ سوشل میڈیا پراتھارٹی بنانے اور یوٹیوب کو بند کرنے پر کام شروع ہو گیا ہے۔ انہوں نے بتایا کہ ستمبر کے آخری ہفتے میں عمران خان ملک جام کرنے کی کال دیں گے۔
شیخ رشید نے الزام لگایا ہے کہ مخالف اینکروں کو اٹھانے پر بھی کام شروع ہو گیا ہے، 13 اتحادی جماعتوں میں بندربانٹ اور ن اور ش آمنے سامنے آگئی ہیں، عمران خان عوام میں ہیں اوراپوزیشن ٹویٹ میں پھنسی ہے، رجیم چینج کے خلاف عمران خان ستمبر کے آخری ہفتے فائنل کال دیں گے۔
انہوں نے مزید کہا کہ فیصلے کا وقت آگیا ہے، عوامی تحریکوں کو کبھی روکا نہیں جاسکتا، 24 گھنٹے کے نوٹس پر عمران خان کا کامیاب جلسہ ہوا جس پر راولپنڈی کےعوام کا مشکور ہوں۔
شیخ رشید نے یہ بھی کہا کہ گزشتہ روز سے سیاسی لڑائی شروع ہو چکی ہے، ہمیشہ صلح صفائی اور بات چیت کا حامی ہوں اور دعویٰ کیا کہ آئندہ 45 دن میں فیصلہ ہو جائے گا۔
یاد رہے کہ اسلام آباد میں چند روز قبل ہونے والے جلسے میں تقریر کو بنیاد بنا کر عمران خان کے خلاف دہشت گردی کی دفعات کے تحت مقدمہ درج کر لیا گیا ہے۔ تاہم عمران خان کی جانب سے وکیل بابر اعوان نے ضمانت کی درخواست دائر کر دی جس پر اسلام آباد کی عدالت نے 3 روزہ ضمانت منظور کر لی ہے۔
تاہم تحریک انصاف کے حامی یوٹیوبرز پر فیک نیوز پھیلانے کے الزامات کے تحت مقدمات درج کر کے گرفتاریوں کا سلسلہ شروع ہو چکا ہے۔ اینکر و یوٹیوبر جمیل فاروقی کو بھی اسی نوعیت کے ایک مقدمے میں گرفتار کیا گیا ہے۔