2 ہلاک دہشت گردوں کی شناخت رحمان نیاز اور حضرت عمر کے نام سے ہوئی : آئی ایس پی آر
شمالی وزیرستان کے مختلف علاقوں میں کارروائیوں کے دوران 10 دہشت گردوں کو ہلاک کر دیا گیا۔ پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے مختلف علاقوں میں کارروائی کرتے ہوئے سکیورٹی فورسز نے 10 دہشت گردوں کو جہنم واصل کر دیا۔ دہشت گردوں کے خلاف الگ الگ کارروائیوں کے دوران فائرنگ کے تبادلے میں 3 دہشت گردوں کو زخمی حالت میں گرفتار کر لیا گیا ہے۔
آئی ایس پی آر کی طرف سے جاری اعلامیہ کے مطابق انٹیلی جنس کی بنیاد پر 8 مارچ کو کارروائی میں 4 دہشت گردوں کو جہنم واصل کیا گیا، جس کے بعد سکیورٹی فورسز کی طرف سے علاقے میں موجود دہشت گردوں کی صفائی کیے گئے آپریشن کے دوران 4 مزید دہشت گرد ہلاک کر دیئے گئے۔
شمالی وزیرستان کے ضلع میں ایک اور کارروائی کے دوران سکیورٹی فورسز نے پاک افغان سرحد پر 5 دہشت گردوں کی طرف سے دراندازی کی اطلاع پر فوری طور پر کارروائی کی گئی۔ سکیورٹی فورسز کے دہشت گردوں سے فائرنگ کے تبادلے میں 2 دہشت گردوں کو ہلاک کر دیا گیا جن کی شناخت رحمان نیاز اور حضرت عمر کے نام سے ہوئی جبکہ 3 دہشت گرد کارروائی میں زخمی ہو گئے۔
واضح رہے کہ پاکستان عبوری افغان حکومت سے متعدد بار مطالبہ کر چکا ہے کہ سرحد کے اطراف موثر بارڈر مینجمنٹ یقینی بنائی جائے۔ پاکستان کی طرف سے توقع ظاہر کی گئی ہے کہ افغان حکومت اپنی سرزمین کو دہشت گردی کی کارروائیوں کے لیے استعمال ہونے سے روکے گی۔ آئی ایس پی آر کے مطابق سکیورٹی فورسز اپنی سرحدیں محفوظ بنانے اور ملک سے دہشت گردی کی لعنت ختم کرنے کیلئے پرعزم ہے۔
- Featured Thumbs
- https://www.siasat.pk/data/files/s3/9ispspkskkhsjgdjhgdf.png
