
چیئرمین پیپلزپارٹی بلاول بھٹو زرداری نے کہا ہے کہ ہمارے سیاسی اتحادی ڈر چکے ہیں اور خوفزدہ ہیں، وہ شائد عام انتخابات سے بھاگنا چاہتے ہیں۔
تفصیلات کے مطابق چیئرمین پیپلزپارٹی بلاول بھٹو زرداری نے حیدرآباد میں ایک تقریب سے خطاب کرتے ہوئے کہا کہ ہم کندھےپر لاشیں اٹھا کر الیکشن لڑنے کے عادی ہیں، ہم انتخابات سے نہیں بھاگیں گے، اگر ہمارے چند اتحادی انتخابات سے بھا گنا چاہتے ہیں تو انہیں بھاگنے دیں۔
انہوں نے کہا کہ 18 ماہ سے اتحادیوں سے کہہ رہا ہوں کہ ڈروگے تو مروگے، افسوس کی بات ہے ہمارے سیاسی اتحادی ڈرچکے ہیں اورشائد عام انتخابات سے بھی بھاگنا چاہتے ہیں،جب آپ الیکشن نہیں لڑتے تو آپ کی سیٹ کوئی اور لے جاتا ہے۔
سابق وزیر خارجہ نے کہا کہ میں نے ایم کیو ایم والوں سے کہا کہ بلدیاتی انتخابات میں حصہ لیں، مگر وہ نہیں مانے، میں نے ان سے بھیک مانگی کہ اپنی جگہ پی ٹی آئی کیلئے مت چھوڑیں، میری صرف پاؤں پکڑنے کی کسر رہ گئی تھی مگر وہ ڈر کر پیچھے ہٹ گئے، میں پی ٹی آئی کو پیغام دینا چاہتا ہوں کہ ہم آپ سے ڈرتے نہیں ہیں، ہم مقابلہ کرنے آرہے ہیں۔
انہوں نےکہا کہ ہم پی ٹی آئی کا نگراں وزیراعظم کی طاقت سے مقابلہ نہیں کریں گے بلکہ عوام کی طاقت سےکریں گے، عوام نے کبھی بھی مجھے مایوس نہیں کیا، ہم حیدرآباد کی عوام کی مدد سے نالائق کو باہر نکالنے میں کامیاب ہوئے،ہمارے جیالوں کی وجہ سے وہ نالائق وزیراعظم نہیں رہا۔
چیئرمین پیپلزپارٹی نے کہا کہ تین نسلوں سے پیپلزپارٹی کی کردار کشی ہورہی ہے، آج بھی پشاور اورپنجاب میں جھوٹا پراپیگنڈہ بکتا ہے، اسلام آبادکے حکمران بڑی بڑی باتیں کررہے ہیں اور یہاں لوگ پانی کیلئے ترس رہےہیں، دریائے سندھ کےکنارے ہونےکے باوجود یہاں کے لوگ پیاسے ہیں، اس شہر کو لندن سے چلانے والوں سے پوچھیں کہ انہوں نے شہر کو ایک قطرہ پانی دینے کیلئے کوئی منصوبہ شروع کیا؟
- Featured Thumbs
- https://www.siasat.pk/data/files/s3/8bialwlitahdargay.jpg