مسلم لیگ ن کے قائد میاں نواز شریف نے پنجاب میں صوبائی اسمبلی کے انتخابات کے حوالے سے پارٹی کو اہم ہدایات جاری کردی ہیں۔
تفصیلات کے مطابق پنجاب میں عام انتخابات کا شیڈول جاری ہونے کے بعد مسلم لیگ ن کی قیادت نے بھی کمر کس لی ہے، اس حوالےسے مسلم لیگ ن کے قائد میاں نواز شریف کی زیر صدارت پارٹی رہنماؤں کا اہم اجلاس ہوا جس میں میاں نواز شریف نے ویڈیو لنک کے ذریعے شرکت کی۔
اجلاس میں پنجاب میں انتخابات کے حوالے سے مشاورت کی گئی، اس موقع پر نواز شریف نے پارٹی رہنماؤں کو ہدایات دیتے ہوئے کہا کہ انتخابات تیس مارچ کو ہوں یا اکتوبر میں ، پارٹی انتخابات کی تیاری رکھے، ضروری ہوگیا ہے کہ ملک کو عمران خان جیسے فتنے سے نجات دلاؤں۔
انہوں نے پارٹی رہنماؤں کو ہدایات دیں کہ ملک میں افراتفری پھیلانے والے عناصر کو قوم کے سامنےا یکسپوزکیا جائے اور عمران خان کے دور حکومت کی تمام بے قاعدگیوں کو غلط فیصلوں کو عوام کے سامنے رکھیں، مریم نواز اس حوالےسے عمران خان اور ان کے سہولت کاروں کو بھرپور انداز میں جواب دے رہی ہیں، باقی پارٹی رہنما بھی مریم نواز شریف کے ہمراہ انتخابی مہم میں بھرپور شرکت کریں۔
صوبائی اسمبلی کے انتخابات میں امیدواروں سے متعلق گفتگو کرتےہوئے سابق وزیراعظم نواز شریف کا کہنا تھا کہ پارٹی وفاداروں اور اپنے حلقوں میں مضبوط امیدواروں کو پنجاب اسمبلی کیلئے ٹکٹس دیں گے۔