جمعیت علمائے اسلام (ف) کے سربراہ مولانا فضل الرحمان نے کہا ہے کہ عمران خان ملزم نہیں بلکہ مجرم ہیں، الیکشن کمیشن کے فیصلے بعد وہ صادق و امین نہیں رہے۔
حکمران اتحاد پاکستان ڈیموکریٹک موومنٹ(پی ڈی ایم) کے سربراہ مولانا فضل الرحمان نے ایک پریس کانفرنس سے خطاب کرتے ہوئے کہا ہے کہ ثابت ہوچکا ہے کہ عمران خان کو غیر ملکی فنڈنگ ملی، پاکستان تحریک انصاف سے 2013 کے بعد کی فنڈنگ کا بھی حساب لیا جائے۔
انہوں نے مزید کہا کہ عمران خان نے الیکشن کمیشن کے سامنے پانچ سال تک جھوٹ بولا اورالیکشن کمیشن میں جھوٹا سرٹیفکیٹ و حلف نامہ جمع کروایا، ان کا بیانیہ ہر دن تبدیل ہوتا رہا ، وہ تاریخ کے ایک نااہل حکمران ثابت ہوئے ہیں۔
مولانا فضل الرحمان نے مزید کہا کہ ممنوعہ فنڈنگ کیس عمرا ن خان کے خلاف فرد جرم بن گئی ہے، ان کے خلاف اب آئین و قانون کے مطابق کارروائی کی جائے گی، اسرائیل و ہندوستا ن سے فنڈنگ لی گئی ، اندازہ لگایا جاسکتا ہے کہ ان کے ارادے کیا تھے۔
سربراہ پی ڈی ایم نے کہا کہ عمران خان نے غیر ملکی کمپنیوں اور شہریوں سے فنڈنگ لی، یہ 2013 تک کے اکاؤنٹس کا حساب کتاب ہے، 2013 کے بعد کی فنڈنگ کا بھی حساب لیا جائےگا، حکومت فوری طور پر ان کے خلاف کارروائی کرکے گرفتاریاں عمل میں لائے، صدر مملکت ڈاکٹر عارف علوی کو بھی فوری طور پر عہدے سے مستعفیٰ ہوجانا چاہیے۔