اسلامی جمہوریہ پاکستان کی76ویں سالگرہ کے موقع پر شعبہ صحافت میں نمایاں خدمات سرانجام دینے والی 14 شخصیات کیلئے قومی اعزازات کا اعلان کیا گیا ہے۔
تفصیلات کے مطابق 14 شخصیات میں ملک کے نامور صحافی و اینکرپرسنز بھی شامل ہیں جنہیں ہلال امتیاز، ستارہ امتیاز، تمغہ امتیاز اور پرائڈ آف پرفارمنس سے نوازا جائے گا، 9 شخصیات کو تمغہ امتیاز،2 کو تمغہ برائے حسن کارکردگی، جبکہ دو شخصیات کو ہلال امتیاز اور ستارہ امتیاز سے نوازا جائے گا۔
خبررساں ادارے کو موصول ہونے والی فہرست کے مطابق وفاقی وزارت اطلاعات و نشریات کی سفار ش پر زاہد ملک کو ہلال امتیاز سے نوازا جائے گا، حکومت پنجاب کی جانب سے واصف ناگی کیلئے ستارہ امتیاز، غلام محمد عارف نجمی اور سہیل وڑائچ کیلئے پرائڈ آف پرفارمنس کی تجویز دی گئی ہے۔
اسی طرح وزارت اطلاعات و نشریات کی تجویز پر سلمان غنی کیلئے بھی پرائڈ آف پرفارمنس، امجد عزیز، غریدہ فاروقی، وقار ستی، فہد حسین، سلیم بخاری، فہد سلیم ملک، شمع جونیجو ، سید تقی حیدر نقوی اور فاروق عادل کو تمغہ امتیاز سے نوازا جائے گا۔
