پیر, 15 اگست 2011 22:56
فلاح انسانیت فاونڈیشن کی سیلاب متاثرین سندھ کیلئے امدادی سرگرمیوں کا آغاز
فلاح انسانیت فاونڈیشن کی سیلاب متاثرین سندھ کیلئے امدادی سرگرمیوں کا آغاز
بدین ۔۔۔فلاح انسانیت فاونڈیشن نے اپنی سابقہ روایات کو برقرار رکھتے ہوئے سندھ کے ہزاروں متاثرین تک پکی پکائی خوراک پہنچانا شروع کر دی ۔ متاثرہ علاقوں میں 5 مقامات پر ریلیف کیمپ قائم کئے گئے ہیں جہاں کارکنان رات بھر کھانا پکانے اور سحری میں تقسیم کرنے میں مصروف ہیں۔ ابتدائی تین دنوں میں 24400 پیکٹ خوراک تقسیم کئے گئے۔ تفصیلات کے مطابق 2010ءکے سیلاب کی طرح فلاح انسانیت فاونڈیشن نے اس سال بھی متاثرین بارش و سیلاب سندھ میں تیار خوراک تقسیم کرنا شروع کر دی۔ متاثرہ علاقوں میں پہلے روز 4 ہزار دوسرے روز 8 ہزار اور تیسرے روز 12400کھانے کے پیکٹ تقسیم کئے گئے۔ جبکہ خواتین اور بچوں میں گوشت کی تقسیم کے لئے دو گائے بھی ذبح کی گئیں۔ ایف آئی ایف کی جانب سے بدین، ملکانی شریف، جھڈو، مٹھی، گولارچی، کھوسکی، کڈن، بیڈمی، نوکوٹ، ٹنڈوالہ یار اور دیگر متاثرہ علاقوں میں روزانہ ہزاروں افراد تک سحرو افطار میں کھانے کے پیکٹ پہنچانے کا انتظام کیا گیا ہے ۔ کارکنان رات بھر ریلیف کیمپوں میں کھانا پکوانے کے بعد مختلف علاقوں میں سحری تقسیم کرتے ہیں۔ جن کی محنتوں اور کاوشوں کو دیکھ کر متاثرین ہاتھ اٹھا اٹھا کر ان کے حق میں دعا ئیں کرتے نظرآتے ہیں ۔