![qaazim1h11i2h1.jpg](https://www.siasat.pk/data/files/s3/qaazim1h11i2h1.jpg)
سپریم کورٹ کے حکم کی روشنی میں پاکستان تحریک انصاف کے رہنما اور قومی اسمبلی کے سابق ڈپٹی اسپیکر قاسم سوری کی رہائش گاہ کے باہر عدالتی طلبی کا نوٹس آویزاں کردیا گیا۔
پولیس حکام کے مطابق سپریم کورٹ کے حکم کی روشنی میں سابق ڈپٹی اسپیکرقاسم سوری کی کوئٹہ میں واقع رہائش گاہ کے باہر عدالت طلبی کا نوٹس آویزاں کیا, قاسم سوری کی عدالت میں طلبی کا نوٹس کوئٹہ کے اخبارات میں بھی شائع کیا گیا ہے۔
گھر کے باہر اور اخبارات میں شائع ہونے والے نوٹس میں قاسم سوری کو 9 جولائی 2024ء کو این اے 265 میں دوبارہ الیکشن کی درخواست پر بطور درخواست گزار عدالت میں پیش ہونے کی ہدایت کی گئی ہے۔
اس سے قبل سپریم کورٹ نے قاسم سوری کی الیکشن ٹربیونل فیصلے کے خلاف اپیل کے معاملے پر سماعت کا تحریری حکم نامہ جاری کیا,جس میں کہا گیا ہے کہ قاسم سوری متعدد بار طلبی کے باوجود جان بوجھ کر عدالت میں پیش نہیں ہورہے۔
عدالت نے کہا قاسم سوری کے بھائی نے عدالتی نوٹس وصول کرنے سے انکار کردیا,سابق ڈپٹی اسپیکر اور رکن پارلیمنٹ کا ایسا رویہ افسوسناک ہے,عدالت نے حکم دیا تھا کہ قاسم سوری کی طلبی کا اشتہار کوئٹہ کے اخبارات میں دیا جائے، قاسم سوری کے گھر پر نوٹس بھی چسپاں کیا جائے,حکم نامے کے مطابق کیس کی آئندہ سماعت 9 جولائی کو ہوگی.