قاضی فائز عیسیٰ پر حملے کے الزام میں منسوخ شدہ پاکستانی شناختی دستاویزات بحال
گزشتہ سال اکتوبر میں لندن کے مڈل ٹیمپل میں سابق چیف جسٹس قاضی فائز عیسیٰ کی آمد کے موقع پر احتجاج کے دوران ان کی گاڑی کو نشانہ بنایا گیا تھا۔
اس واقعے کے بعد پاکستانی وزارت داخلہ نے ذمہ دار افراد کی شناخت کرکے ان کے خلاف کارروائی کا حکم دیا تھا، اور برطانوی حکومت سے ان کی حوالگی کا مطالبہ بھی کیا گیا تھا۔
وزیر داخلہ محسن نقوی نے ان افراد کی شہریت منسوخ کرنے کی کارروائی شروع کرنے کا عندیہ دیا تھا، تاہم اب یہ عمل روک دیا گیا ہے۔
ذرائع کے مطابق، لندن میں ہونے والے اس حملے کے الزام میں جن پاکستانیوں کے شناختی کارڈ اور پاسپورٹ منسوخ کیے گئے تھے، انہیں بحال کر دیا گیا ہے۔
مزید برآں، اطلاعات کے مطابق حکومت نے پی ٹی آئی سے تعلق رکھنے والے افراد کی شناختی دستاویزات منسوخ کرنے کا عمل بھی روک دیا ہے۔
یاد رہے کہ قاضی فائز عیسیٰ کی لندن میں مڈل ٹیمپل سے روانگی کے دوران گاڑی کو روکنے اور اس کا دروازہ کھولنے کی کوشش کی گئی تھی، جس پر سخت ردعمل سامنے آیا تھا۔
