درگاہ منیجر زبیر بلوچ نے تحقیقاتی کمیٹی کے سامنے اپنا جرم قبول کرتے ہوئے چوری کرنے کا اعتراف کیا تھا: ذرائع
صوبہ سندھ کے ضلع جامشورو کے علاقے سیہون شریف میں قائم معروف صوفی بزرگ حضرت لعل شہباز قلندرؒ کے مزار سے سونا اور زیورات چوری ہونے کے معاملے میں پیشرفت سامنے آئی ہے۔ ذرائع کے مطابق حضرت لعل شہباز قلندرؒ کی درگاہ سے 1مہینے کے دوران 1 کروڑ 23 لاکھ 72 ہزار 863 روپے مالیت کا نذرانے میں دیا گیا سونا چوری ہونے پر درگاہ منیجر زبیر بلوچ کو معطل کرنے کے بعد مقدمہ درج کر لیا گیا ہے۔
ترجمان وزارت مذہبی امور سندھ نے بتایا کہ ایڈمنسٹریٹر اوقاف سکھر کی مدعیت میں درگاہ کے منیجر زبیر بلوچ اور ایک مفرور ملزم علی رضا گوپانگ پر ضلع جامشورو میں مقدمہ درج کر لیا گیا ہے۔ نگران وزیر اوقاف سندھ عمر سومرو کی ہدایت پر محکمہ اوقاف سندھ نے درگاہ منیجر زبیر عمر سے ریکوری کرنے کے ساتھ ساتھ سخت قانونی کارروائی کرنے کیلئے خط بھی لکھ دیا ہے۔
ضلع جامشورو میں ملزمان کے خلاف درج کی گئی ایف آئی آر کے مطابق لعل شہباز قلندرؒ کی درگاہ کے توشہ خانہ سے 57 تولے سونا اور 3ہزار 133 تولے چاندی چوری کی گئی ہے۔ درگاہ کے منیجر زبیر بلوچ نے علی رضا گوپانگ نامی ملازم کے ساتھ ملی بھگت کر کے درگاہ سے خوردبرد کر کے سونا چوری کیا۔ وزیر اوقاف سندھ کا کہنا تھا کہ زبیر بلوچ کو معطل اور تنخواہ وپنشن روک کر نوٹیفیکیشن جاری کر دیا گیا ہے۔
واضح رہے کہ درگاہ منیجر زبیر بلوچ نے تحقیقاتی کمیٹی کے سامنے اپنا جرم قبول کرتے ہوئے چوری کرنے کا اعتراف کیا تھا۔ حضرت لعل شہباز قلندرؒ کی درگاہ سے اتنی بڑی واردات کے بعد نگران حکومت سندھ کی طرف سے صوبے میں قائم تمام درگاہوں کے منیجرز کے خلاف تحقیقات کرنے کا فیصلہ بھی کیا گیا ہے۔