پاکستان تحریک انصاف کی طرف سے چیئرمین پی ٹی آئی عمران خان کی وکالت کیلئے برطانوی وکیل کو مقرر کیے جانے کی خبر پر مسلم لیگ ن اور ان کے حامی صحافیوں کی جانب سے مذہب کارڈ کا استعمال کیا جا رہا ہے۔
لاہور میں پریس کانفرنس کرتے ہوئے عطاء اللہ تارڑ نے کہا کہ عالمی عدالتوں میں چیئرمین پی ٹی آئی کی طرف سے ملعون سلمان رشدی کے وکیل بیرسٹر جیفری رابرٹسن کو ہائر کر کے سیاست بچانے کیلئے تمام حدیں پار کر دی گئی ہیں۔
سینئر صحافی وتجزیہ نگار طلعت حسین نے تحریک انصاف کی طرف سے انسانی حقوق کے معروف برطانوی بیرسٹر جیفری رابرٹسن کو وکیل مقرر کرنے کی خبر پر ردعمل دیتے ہوئے لکھا کہ:چیئرمین پی ٹی آئی کی وکالت کیلئے ملعون سلیمان رشدی کے وکیل اور عیسیٰ علیہ السلام کے خلاف توہین رسالت کے محافظ کو عالمی سطح پر نمائندگی کیلئے منتخب کرنے کا فیصلہ سیاسی خودکشی کے مترادف ہے لیکن اب یہ معاملہ عمران خان کے ریاستی تحفے بیچنے والے مجرم کے بجائے اسے ضمیر کے بین الاقوامی قیدی کے طور پر رنگنے کا ہے۔
طلعت حسین کے ٹوئٹر پیغام پر شدید ردعمل دیتے ہوئے سینئر صحافی وتجزیہ نگار ضرار کھوڑو نے خبروں کے لنک شیئر کرتے ہوئے لکھا کہ: طلعت صاحب مذہب کارڈ استعمال کرنا انتہائی مہلک ہوتا ہے! آپ یہ بھی جانتے ہوں گے کہ اسی فرم کو پاکستان مسلم لیگ ن اور میر شکیل الرحمن کی طرف سے اپنے کیسز لڑنے کیلئے ہائر کیا گیا تھا۔
قبل ازیں چیف آرگنائزر مسلم لیگ ن مریم نوازشریف نے بھی اس حوالے سے ٹوئٹ کرتے ہوئے لکھا تھا کہ: کتنے تعجب کی بات ہے کہ عمران خان نے اپنی نمائندگی کیلئے اسی وکیل کو انتخاب کیا ہے جس نے ملعون سلمان رشدی کا مقدمہ لڑا تھا۔ عمران خان کا دوہرا چہرا سامنے آگیا ہے، باہر کی دنیا میں اسلام مخالف لابی سے مدد کی اپیل اور پاکستان میں ریاست مدینہ کے جھوٹے دعوے!
