![6solnangifuaziaijksjhs.png](https://www.siasat.pk/data/files/s3/6solnangifuaziaijksjhs.png)
نگراں وزیر اطلاعات و نشریات مرتضیٰ سولنگی کے دور میں پاکستان ٹیلی ویژن کا ایک کروڑوں روپے کا مالی اسکینڈل سامنےآگیا ہے۔
تفصیلات کے مطابق پاکستان ٹیلی ویژن کےنیوز پروگرام ڈیپارٹمنٹ کی جانب سے 15 مارچ 2024کی تاریخ کے جاری کردہ لاکھوں روپے کے چیکس منظر عام پر آئے ہیں جو فوزیہ یزدانی اور عامر شفیع غوری کے ناموں پر جاری کیے گئے ہیں۔
سینئر صحافی و پروڈیوسر عدیل راجا نے ان چیکس کی تصاویر شیئر کرتےہوئے کہا کہ نگراں وزیراطلاعات مرتضیٰ سولنگی کی لوٹ مار کی داستان سامنے آنا شروع ہوگئی، جلد بہت کچھ مزید منظر عام پرآئے گا۔
انہوں نے اپنی دوسری ٹویٹ میں کہا کہ پی ٹی وی کی تاریخ میں پہلی بار پوسٹ ڈیٹڈ چیکس جاری کیے گئے ہیں جو کہ لاکھوں روپے مالیت کے ہیں، پی ٹی وی ذرائع کا کہنا ہے کہ یہ چیکس مرتضیٰ سولنگی کی ہدایات پر جاری کیے گئے۔
عدیل راجا کا مزید کہنا تھا کہ نیادورسے پی ٹی وی لوٹ مار، یزدانی اور مرتضیٰ سولنگی جنہیں رضا رومی نے اسپانسر کیا تھا۔
صحافی رائے ثاقب کھرل نے کہا کہ جن خاتون کے نام پر چیکس جاری ہوئے یہ خاتون کون ہیں؟ یہ کس چینل میں کام کرتی ہیں یا ان کا کتنا تجربہ ہے؟ کوئی ردعمل آیا اس بارے میں ؟
سید کوثر کاظمی نے بھی ان چیکس کی تصاویر شیئر کیں اور کہا کہ پی ٹی وی اور نگراں حکومت ان دو افراد پر اتنی مہربان کیوں ہورہی ہے؟ ان افراد کو الیکشن ٹرانسمیشن کی مد میں لاکھوں روپے دیئے گئے، معاملہ اتنا سادہ نہیں ہے، یقینا ایک دو حصہ دار ضرور ہوں گے۔
سینئر صحافی محسن رضا خان انکشاف کیا کہ مرتضیٰ سولنگی نے ایک طرف شہباز حکومت میں اہم عہدے کے حصول کیلئے کوششیں شروع کردی ہیں تو دوسری جانب ان کی بدعنوانیوں اور لوٹ مار کی داستانیں بھی سامنے آرہی ہیں، مرتضیٰ سولنگی نےصحافیوں کےپلاٹوں کی فہرست میں میرٹ کو بالائے طاق رکھتے ہوئے اپنا نام شامل کرکے فہرست کو متنازعہ بنادیا ہے۔
انہوں نے مزید کہا کہ الیکشن ٹرانسمیشن میں من پسند افراد کو کروڑوں روپے کے چیکس دیئے گئے جو منظر عام پر آئے تو کئی افسران کے تبادلے اور شوکاز نوٹسز جاری کیے گئے، کروڑوں روپے خرچ کرنے کےباوجود پی ٹی وی کی ریٹنگز مسلسل تنزلی کا شکار ہیں۔
صحافی سعید بلوچ نے کہا کہ ابھی عمران خان اور ان کی اہلیہ کے خلاف گفتگو کرنے والے مزید افراد کے نام سامنے آئیں گے جنہیں چن چن کر نوازا گیا، جس شخص نے عمران خان کے خلاف توشہ خانہ والی درخواست دی تھی اس کو بھی پی ٹی وی میں پروگرام دیا گیا تھا۔