Enlightened10
Minister (2k+ posts)
کل مفتی تقی عثمانی صاحب نے ٹویٹ کیا ہے کہ پانچ دوشیزائیں عالمی مقابلہ حسن میں پاکستان کی نمائندگی کریں گی تو دنیا میں پاکستان کا بحیثیت ایک اسلامی ملک کیا امیج جائے گا؟؟ حکومت اس کا فوراً نوٹس لے.
سب سے پہلے تو یہ جان کر انتہائی خوشی ہوئی کہ آپ نہ صرف زندہ ہیں بلکہ ملکی حالات سے پوری طرح واقف ہیں اور نظر رکھے ہوئے ہیں. آپ سے چند سوالات پوچھنے کی جسارت کر رہی ہوں.
1. اس وقت ملک میں بدترین مہنگائی مسلط ہے. لوگ خودکشیاں کر رہے ہیں. اکثر پڑھتے ہیں کہ غربت کے مارے خواتین عصمت بیچنے پر تیار ہوگئی ہیں. کیا آپ کو لگتا ہے کہ اس سے پاکستان کی نیک نامی کو چار چاند لگ رہے ہیں؟؟؟
2. ملک میں بدترین سیاسی انتقام لیا جا رہا ہے. بے گناہ خواتین بغیر کسی سنوائی کے جیلوں میں پڑی ہیں. رات دو تین بجے ریڈ ہوتی ہے. عثمان ڈار کی ماں کا دوپٹہ کھینچا جاتا ہے. تیرہ سالہ ارسلان کی بہنوں کو دل بہلانے کا سامان کہا جاتا ہے. ارسلان کو کیک اور کبوتر کہا جاتا ہے. ارشد شریف کے قتل پہ کوئی تحقیقات تو ایک طرف فریاد کرنے پر ارشد شریف کی بیوہ پہ ناقابل ضمانت وارنٹ جاری ہو جاتا ہے. ان انسانی حقوق کی بدترین خلاف ورزی پر پاکستان کا نام پوری دنیا میں کتنا روشن ہو رہا ہے اس پہ روشنی ڈالنا پسند فرمائیں گے؟؟؟
3. فاطمہ کا ریپ ہوا، قتل کردی گئی. رپورٹ رونگٹے کھڑے کر دینے والی ہے. اس سے پاکستان کی عزت پہ کوئی حرف نہیں آتا؟؟
4. رضوانہ کا کٹا پھٹا وجود، تقریباً قریب المرگ جج کے گھر سے برآمد ہونے پر پاکستان کی شہرت یقیناً آسمان پر پہنچ گئی ہوگی. آپ نے کبھی رضوانہ کے بارے میں استفسار کیا؟؟
5. عباد کے بیٹے عمار کی وڈیو مجھ سے دیکھی نہیں جاتی. میں عباد سے ہاتھ جوڑ کر التجا کر رہی ہوں کہ اللہ کا واسطہ ہے پریس کانفرنس کرلو اور اپنے بیٹے کو بچالو کہ اسے کسی بھی اسپتال نے ٹریٹمنٹ دینے سے انکار کردیا ہے. اس سے یقیناً ہم ساری دنیا میں سرخرو ہو رہے ہوں گے. وہ آپ کو نظر نہیں آتا؟؟؟
6. ابھی دو دن پہلے ایک بچے سے جنسی زیادتی کی وڈیو آئی ہے جس میں ایک مولوی صاحب کا چہرہ نمایاں ہے. بطور اس طبقے کے نمائندہ آپ نے اس بارے میں کیا کیا ہے؟ آپ کے خیال میں کیا اس سے پاکستان کا نام خاک میں نہیں مل رہا؟؟؟
مفتی صاحب ان 5 خواتین کے مقابلہ حسن میں شرکت سے معاشرے کو زیادہ نقصان ہو رہا ہے یا یہ ظلم و بربریت، قانون اور آئین کی پامالی، انسانی حقوق کے دھجیاں اڑانے سے ہو رہا ہے. کیا ظلم اور قانون کو پیروں تلے روندنا اسلام کے مطابق ہے؟
آپ اگر خود کو معاشرے کا زمہ دار سمجھتے ہیں تو پھر ہر غلط کو غلط کیوں نہیں کہتے ؟ یاد رکھیں جس کا جتنا رتبہ اور طاقت ہوتی ہے اس کی جوابدہی بھی اتنی ہی بڑی ہوتی ہے.
پلیز کوئی یہ نہ کہے کہ مفتی صاحب سیاست نہیں کرتے. ظلم کو ظلم کہنا سیاست نہیں. سیاست اس وقت ہوتی ہے جب فضل الرحمن کو ڈیزل کہنے پہ آپ کو فوراً قرآنی آیات یاد آجاتی ہیں لیکن بدترین ظلم اور زیادتی پر، جن پہ قرآن مجید میں واضح آیات ہیں وہ آپ بھولے سے بھی ٹویٹ نہیں کرتے.
یہ سوالات یا آئینہ صرف مفتی صاحب کے لیے نہیں ان تمام دین داروں اور دین دارنیوں کے لیے بھی ہے جن کو اسلام صرف سلکٹڈ معاملات میں ہی یاد آتا ہے.
اللہ ہم سب کو سچ بولنے کی توفیق عطا فرمائے اور منافقت سے دور رکھے آمین ثم آمین یا رب
As received
