جمعیت علمائے اسلام ف کے سربراہ مولانا فضل الرحمان نے صدر، وزیراعظم ، اسپیکر و ڈپٹی اسپیکر کے انتخابات کے بائیکاٹ کا اعلان کردیا ہے۔
تفصیلات کے مطابق جے یو آئی ف کے سربراہ مولانا فضل الرحمان نے اسلام آباد میں میڈیا سے گفتگو کرتے ہوئے کہا کہ جے یو آئی ف صدر، وزیراعظم، اسپیکر و ڈپٹی اسپیکر کے انتخابی عمل کا حصہ نہیں بنے گی۔
مولانا فضل الرحمان نے قومی اسمبلی کی ان اہم کارروائیوں میں ووٹ دینے سے انکار کرتے ہوئے انتخابی عمل کے بائیکاٹ کا اعلان بھی کیا۔
خیال رہے کہ گزشتہ روز مسلم لیگ ن، پیپلزپارٹی اور دیگر اتحادی جماعتوں کے رہنماؤں نے مولانا فضل الرحمان سے ملاقات کی، ملاقات میں مولانا نے عام انتخابات اور نئی حکومت کی تشکیل کے حوالے سے اپنے شدید تحفظات کا اظہار کیا اور ساتھ ہی ماضی کی سیاسی جدوجہد، قربانیوں اور یاد دہانیوں کا تذکرہ کیا اور الیکشن کمیشن و دیگر اداروں کے حوالے سے اپنے تحفظات سامنے رکھے۔
اس موقع پر حکومتی وفد نے مولانا فضل الرحمان سے اپنے فیصلے پر نظرثانی کی درخواست کرتے ہوئے صدر، وزیراعظم، اسپیکر و ڈپٹی اسپیکر کیلئے حمایت کا اصرار کیا، جس پر جے یو آئی ف نے موقف اپنایا کہ ہمیں ان سے تحفظات ہیں جنہوں نے الیکشن کروائے، ہم نے حکومت سازی کا حصہ نا بننے کا فیصلہ کیا ہے۔
