پاکستان تحریک انصاف پارلیمنٹرینز کے سربراہ پرویز خٹک نے کہا ہے کہ میں لوٹا بن کر کسی دوسری جماعت میں نہیں گیا بلکہ میں نے اپنی جماعت بنالی۔
تفصیلات کے مطابق پاکستان تحریک انصاف پارلیمنٹرینز کے سربراہ پرویز خٹک سے پی ٹی آئی کے سابق رکن صوبائی اسمبلی نصیر وزیر نے ملاقات کی اور پاکستان تحریک انصاف پارلیمنٹرینز میں شمولیت کا اعلان کیا۔
اس موقع پر پرویز خٹک نےکہا کہ جنوبی وزیرستان کو اس وقت کافی مصیبتوں کا سامنا ہے، نصیر خان وزیر کی ہماری جماعت میں شمولیت پر ان کے شکر گزار ہیں، ہم ملک کی ترقی چاہتے ہیں ، ہم کسی ادارے سے تصادم نہیں چاہتے، میں سیاسی مجرموں کے خلاف کھڑا ہو ، ان مجرموں نے 75 سال پاکستان کو لوٹا، اب قوم جاگ چکی ہے ، میں اب خاموش نہیں رہوں گا۔
انہوں نے مزید کہا کہ جیل میں قید بانی پی ٹی آئی سے مجھ سے زیادہ قریب کوئی نہیں تھا، ان کے دورمیں نا نیا پاکستان بنا نا ہی ترقی ہوئی، صرف انتشار ہی انتشار رہا،میں نے سابق وزیراعظم کو کئی بار کہا ہے کہ ہم انتشار کیلئے نہیں بلکہ ملک کی ترقی کیلئے آئے ہیں، مگر ان کا ایجنڈاصرف ملک میں انتشار کا تھا۔
پرویز خٹک نے کہا کہ لیڈرز اپنے ورکرز کو تہذیب سکھاتا ہے، کوئی باپ بھی اپنے بچوں کو گالیاں دینا نہیں سکھاتا،، عمران خان اپنے غرور میں تھے اور غرور اللہ کو پسند نہیں ہے۔