پاکستانی شہریوں کے قتل پر ایران کی طرف سے مکمل تعاون کی یقین دہانی کروائی گئی ہے: پاکستانی سفیر
ذرائع کے مطابق ایران کے سرحدی علاقے سراوان میں نامعلوم افراد نے فائرنگ کر کے 9 پاکستانیوں کو قتل کر دیا جبکہ واقعے میں 3 شہری زخمی بھی ہوئے، جاں بحق ہونے والے 2پاکستانیوں کا تعلق لودھراں سے بتایا گیا ہے۔
ایران میں رہائش پذیر مقتول زبیر کے دوست نجیب الرحمن نے نجی ٹی وی چینل سے گفتگو میں بتایا کہ فائرنگ سے اظہر جاں بحق جبکہ بھائی زخمی ہوا جس نے بتایا کہ رات 2 بجے کے قریب 2 نامعلوم مسلح افراد نے ان کے کوارٹر گھس کر فائرنگ کی۔
نجیب الرحمن نے بتایا کہ مقتولین کے کوارٹر سے تھوڑے سے فاصلے پر ہم رہائش پذیر ہیں لیکن فاصلے اور شدید سردی کے باعث فائرنگ کی آواز نہیں آئی۔
افسوسناک سانحے میں جاں بحق ہونے والے شہریوں کے اہل خانہ کے مطابق زبیر اور اس کا بھانجھا ایران میں مزدوری کیلئے گئے ہوئے تھے۔ جاں بحق اور زخمی ہونے والے پاکستانی مقامی ورکشاپ پرگاڑیوں کی ڈینٹنگ پینٹنگ کا کام کرتے تھے۔
ایران میں جاں بحق 5 افراد کا تعلق مظفر گڑھ کی تحصیل علی پور سے بتایا گیا ہے جن میں سے 2 بھائی بھی شامل ہیں۔ جاں بحق افراد کے لواحقین نے اسسٹنٹ کمشنر علی پور سے رابطہ کر کے مطالبہ کیا کہ لواحقین کی میتیں لانےمیں ان کی مدد کی جائے۔ جاں بحق مزدوروں کے اہلخانہ نے بتایا کہ جاں بحق 2 مزدوروں کا تعلق لودھراں کے علاقےگیلے وال سے ہے۔
ایران میں تعینات پاکستانی سفیر مدثر ٹیپو کی طرف سے پاکستانی شہریوں کے ایران میں قتل پر گہرے دکھ اور صدمے کا اظہار کرتے ہوئے اپنے بیان میں کہا کہ پاکستانی سفارتخانہ جاں بحق افراد کے اہل خانہ کی مکمل طور پر مدد کرے گا۔ زاہدان میں موجود پاکستانی قونصل جنرل نے جائے وقوعہ اور ہسپتال کا دورہ کیا ہے اور پاکستانی شہریوں کے قتل پر ایران کی طرف سے مکمل تعاون کی یقین دہانی کروائی گئی ہے۔
مدثر ٹیپو نے سماجی رابطوں کی ویب سائٹ ٹوئٹر پر اپنے پیغام میں لکھا: سراوان میں 9 پاکستانیوں کے ہولناک قتل پر گہرا صدمہ۔ سفارت خانہ سوگوار خاندانوں کی مکمل مدد کرے گا۔ وکیل زاہدان پہلے ہی جائے حادثہ اور ہسپتال جا چکے ہیں جہاں زخمی زیر علاج ہیں۔ ہم نے اس معاملے میں مکمل تعاون کرنے کا مطالبہ کیا۔
