نشے میں دھت ایک پاکستانی مسافر نے دوران پرواز فضائی میزبان کو ٹکر دے ماری، فضائی عملے نے مشتعل مسافر کو پکڑ کر کرسی سے باندھ دیا۔
تفصیلات کے مطابق یہ واقعہ اتوار کی رات متحدہ عرب امارات سے اسلام آباد آنے والی ایک پرواز میں اس وقت پیش آیا جب بزنس کلاس میں ایک پاکستانی مسافر مشتعل ہوکر بھپر گیا۔
فضائی عملے اور کیبن کریو نے مسافر کو روکنے کی کوشش کی، اسی دوران مشتعل مسافر نے ایک مرد فضائی میزبان کو ٹکر دے ماری، کیبن کریو نے مسافر کو روکنے کی کوشش میں اسے نیچے گرادیا۔
اس سارے واقعہ کی ویڈیو بھی سوشل میڈیا پر وائرل ہوئی ہے جس میں دیکھا جاسکتا ہے کہ ایک ایئر ہوسٹس اس موقع پر بھاگتے ہوئے ہنگامی سیاہ کیبل تھامے بھاگتی ہوئی آئی، یہ تارجہاز میں بے قابو مسافروں کو کنٹرول کرنے کیلئے رکھا جاتا ہے۔
انتظامیہ کا کہنا ہے کہ مذکورہ مسافر کو کنٹرول کرنے کے بعد سیٹ سے باندھا گیا تھا اور 26 فروری کو اسلام آباد میں 1 بج کر 20 منٹ پر لینڈ ہونے تک باندھ کر ہی رکھا گیا۔
عینی گواہان اور جہاز میں سفر کرنے والے دیگر مسافروں کا کہنا تھا کہ مشتعل مسافر نشے میں دھت تھا اور انتہائی پرتشدد تھا، مسافر خوفزدہ تھے کہ کہیں وہ ان پر حملہ نا کردے، لوگ اس مسافر کے پاس سے گزرنے سے بھی گریز کررہے تھے، ایمریٹس کے فضائی عملے نے اس مسافر کو باندھ کررکھا مگر ایسا لگتا ہے کہ پاکستانی حکام نے اس مسافر کو جانے دیا کیونکہ اس کے تعلقات بہت اچھے تھے۔
پاکستانی حکام نے واقعہ پرردعمل دیتے ہوئے کہا ہے کہ پائلٹ کی جانب سے آگاہی ملنے پر ایئرپورٹ پر اے ایس ایف الرٹ ہوگئی تھی، جنہوں نے لینڈنگ کے بعد حسن نامی مسافر کو تحویل میں لیا اور کڑی نگرانی میں اے ایس ایف کنٹرول روم منتقل کرکے پوچھ گچھ کی گئی۔
—- jab in ko alcohol pilao gaye tu yehi anjaam ho ga
