ہمارے دوراقتدار میں ملک نے ترقی کی اور عوام کو ہر ممکن ریلیف فراہم کیا گیا: قائد ن لیگ
ذرائع کے مطابق قائد مسلم لیگ ن میاں محمد نوازشریف اور سابق وزیراعظم شہبازشریف کی صدارت میں آج مسلم لیگ ن کے مرکزی پارلیمانی بورڈ کا چوتھا اجلاس ماڈل ٹائون سیکرٹریٹ لاہور میں منعقد کیا گیا۔ اجلاس میں مریم نوازشریف، احسن اقبال، اسحاق ڈار اور پارٹی کے مرکزی وصوبائی عہدیداروں نے شرکت کی۔
ن لیگ پارلیمانی بورڈ کے اجلاس میں صوبہ بلوچستان سے پارٹی امیدوار کے انتخاب کے لیے 87 امیدواروں کے انٹرویو کیے گئے۔
سابق وزیراعظم وقائد مسلم لیگ ن نوازشریف نے اجلاس کے بعد بلوچستان سے تعلق رکھنے والے پارٹی رہنمائوں سے گفتگو کی۔ ان کا کہنا تھا کہ زمینی حقائق کو مدنظر رکھ کر تمام امیدواروں کے پروفائل کا جائزہ لیا گیا، پارٹی ٹکٹ امیدواروں کو شفافیت ومیرٹ کو بنیاد بنا کر جاری کیے جائیں گے۔
انہوں نے کہا کہ مسلم لیگ ن نے آئندہ عام انتخابات کے لیے مکمل تیاری کر رکھی ہے، عوام نے اقتدار کے لیے منتخب کیا تو مسلم لیگ ن ملک کے غریبوں کا سہارا بنے گی۔ ہمارا ایجنڈا سڑکوں، صحت اور تعلیم تک محدود نہیں ہے، پہلے بھی ہمارے دوراقتدار میں ملک نے ترقی کی اور عوام کو ہر ممکن ریلیف فراہم کیا گیا۔
نوازشریف نے کہا کہ اقتدار میں بہت سے باتیں کرنے والے آئے لیکن عملی طور پر کسی نے بھی کچھ نہیں کیا، گوادر کو ہم نے صوبہ سندھ کے ساتھ ملایا اور کوسٹل ہائی وے بنائی۔ ہم نے ہر دور میں عوام کو ریلیف دیا اور ملکی تعمیر وترقی میں اپنا بھرپور کردار ادا کیا، عوام کو پوچھنا چاہیے کہ وہ تبدیلی کہاں گئی؟
واضح رہے کہ مسلم لیگ ن کی طرف سے اب تک راولپنڈی، سرگودھا، مالاکنڈ اور ہزارہ سے پارٹی ٹکٹ کے لیے امیدواروں کے ناموں پر غور کیا جا چکا ہے۔ ذرائع کے مطابق ن لیگ کے مرکزی پارلیمانی بورڈ اجلاس میں بلوچستان سے صوبائی اسمبلی کی نشستوں کیلئے 51 جبکہ قومی اسمبلی کی نشستوں کیلئے 16 امیدواروں کے نام فائنل کیے جا چکے ہیں۔
ذرائع کا کہنا ہے کہ قائد مسلم لیگ ن میاں محمد نوازشریف نے پارلیمانی بورڈ کے اجلاس میں بلوچستان سے تعلق رکھنے والے پارٹی ٹکٹ کے امیدواروں سے ان کے متعلقہ حلقوں، ان کی سیاسی شہرت اور مسلم لیگ ن کے لیے خدمات بارے سوالات کیے۔ اجلاس میں فائنل کیے گئے امیدواروں کے ناموں کا اعلان قیادت کی طرف سے کچھ دنوں بعد کیا جائے گا۔
