نگراں وفاقی حکومت نے تمام وزارتوں، سرکاری اداروں و محکموں کو غیر قانونی طور پر کام کرنے والی سروگیٹ کمپنیوں کے ساتھ معاہدہ کرنے یا تعاون کرنے پر سخت پابندی عائد کردی ہے۔
تفصیلات کے مطابق وفاقی وزارت اطلاعات و نشریات کی جانب سے مختلف وزارتوں، اداروں اور محکموں کو ایک مکتوب جاری کیا گیا ہے جس میں کہا گیا ہے کہ تمام ادارے پرنٹ، الیکٹرانک اور سوشل میڈیا پر غیر قانونی طور پر آپریٹ کرنے والی سروگیٹ کمپنیوں کے ساتھ کسی قسم کا معاہدہ یا تعاون نا کیا جائے۔
مکتوب میں مزید کہا گیا ہے کہ کچھ سروگیٹ کمپنیوں کی جانب سے غیر قانونی طور پر کئی اسپورٹس انٹرپرائزز، میڈیا آؤٹ لیٹس کے ساتھ اشتہارات اور اسپانسر شپ کے معاہدے دیکھے گئے ہیں، سٹے میں مصروف کمپنیوں میں ایم سی ڈبلیو اسپورٹس، میل بیٹ، ون ایکس بیٹ، وولف777 نیوز، دافا نیوز اور بی جے اسپورٹس شامل ہیں۔
نگراں حکومت نے اس تناظر میں پاکستان کرکٹ بورڈ(پی سی بی) کو بھی ہدایات جاری کی ہیں کہ پاکستان سپر لیگ کی تمام فرنچائز اور دیگر کرکٹ کی تنظیموں کو ایسی کمپنیوں کے ساتھ معاہدوں، کاروبار یا تعاون کو فوری طور پر بند کرنے کے احکامات جاری کیے جائیں۔
