ملک بھر میں انتخابات کی دھوم مچی ہیں,سیاسی جماعتیں ایک دوسرے کو شکست دینے کی بھرپور تیاریاں کر رہی ہیں,ملک کی دو بڑی سیاسی جماعتوں مسلم لیگ (ن) اور پیپلز پارٹی کی جانب سے بلوچستان میں قومی اسمبلی کی نشست کے لیے ایک ہی شخص کو ٹکٹ دے دیا گیا۔
عام انتخابات 2024 کے انعقاد کی غیر یقینی صورتحال سے شاید سیاسی جماعتیں خود بھی خوش گمان نہیں اس لیے ٹکٹوں کی تقسیم کا معاملہ بھی نمٹایا ہی جارہا ہے۔
مسلم لیگ (ن) اور پیپلز پارٹی نے این اے 259 کیچ گوادر کی نشست پر یعقوب بزنجو کو ٹکٹ دیا ہے اور دلچسپ بات یہ ہے کہ ان کا تعلق ان دونوں جماعتوں میں سے کسی کے ساتھ نہیں۔
ن لیگ کی جانب سے 3 جنوری کو ایکس ہینڈل پر قومی و صوبائی اسمبلی کی نشستوں کے لیے امیدواروں کی فہرست جاری کی گئی تھی جس میں یعقوب بزنجو کا نام بھی شامل ہے۔
چند روز قبل خبریں سامنے آئی تھیں کہ یعقوب بزنجو نے ن لیگ کا ٹکٹ لینے سے انکار کردیا ۔
پیپلز پارٹی کے میڈیا سیل کی جانب سے جاری کردہ فہرست میں بھی یعقوب بزنجو کا نام شامل تھا۔
سابق ایم این اے یعقوب بزنجو کے حوالے سے کہا جارہا تھا کہ انہوں نے نہ تو ن لیگ میں شمولیت اختیار کی نہ ہی ٹکٹ کے لیے اپلائی کیا مگر انچارج ن لیگ الیکشن سیل اسحاق ڈار نے پھر بھی ٹکٹ جاری کردیا۔
دوسری جانب سماجی رابطوں کی ویب سائٹ ایکس پر خبریں زیر گردش ہیں کہ یعقوب بزنجو نے بلوچستان کی قومی اسمبلی کی نشست گوادر کیچ سے الیکشن لڑنے کے لیے پیپلز پارٹی کا ٹکٹ قبول کر لیا ہے۔
ن لیگ کے رہنما اسحاق ڈار کی جانب سے جاری کی گئی فہرست کے مطابق مسلم لیگ ن کی جانب سے قومی اسمبلی کے حلقہ این اے 49 کے لیے شیخ آفتاب احمد ٹکٹ ہولڈر ہوں گے۔
این اے 50 سے ملک سہیل خان، این اے 51 راجہ اسامہ سرور، این اے 52 راجہ جاوید اخلاص، این اے 53 سے راجہ قمرالاسلام کو ٹکٹ دیا گیا ہے۔
ن لیگ نے قومی اسمبلی کے حلقہ این اے 55 سے ملک ابرار احمد کو ٹکٹ دیا ہے، جبکہ این اے 53 سے حنیف عباسی ٹکٹ ہولڈر ہوں گے۔
اسلام آباد میں پاکستان تحریک انصاف کا سینٹرل سیکرٹریٹ بند کردیا گیا, پارٹی ورکرز اور رہنماؤں نے سیکرٹریٹ پر ٹکٹوں کی تقسیم پر احتجاج کیا تھا،جس کے بعد اب ترجمان پی ٹی آئی رؤف حسن کی جانب سے سینٹرل سیکرٹریٹ بند کیے جانے کی تصدیق کردی گئی ہے۔
ترجمان پی ٹی آئی رؤف حسن کا کہنا ہے کہ فی الحال سیکرٹریٹ میں سیاسی سرگرمیاں روک دی گئی ہیں,انہوں نے مزید کہا کہ سیکرٹریٹ میں احتجاج کے دوران کچھ شرپسند دیکھے گئے، سیکرٹریٹ کے قریب ممکنہ طور پر کوئی خطرناک پیش رفت کا خدشہ ہے.
- Featured Thumbs
- https://www.siasat.pk/data/files/s3/yaqoob1h12.jpg
