عوامی نیشنل پارٹی(اے این پی) نے شہباز شریف حکومت کی جانب سے ایک بڑی پیشکش ٹھکرادی ہے۔
خبررساں ادارے کی رپورٹ کے مطابق عوامی نیشنل پارٹی کے رہنما امیرحیدر ہوتی نے وزیراعظم شہباز شریف کی جانب سے خیبر پختونخوا کے گورنر شپ لینے سے معذرت کرلی ہے۔
رپورٹ کے مطابق امیر حیدر ہوتی نے وزیراعظم شہباز شریف سے ملاقات کی، دونوں رہنماؤں کے درمیان اس ملاقات میں موجودہ سیاسی صورتحال اور دیگر امور پر تبادلہ خیال کیا گیا،ملاقات کا واحد مقصد میں شہباز شریف نے اے این پی کو خیبر پختونخوا کی گورنر شپ لینے کیلئے قائل کرنا تھا ۔
شہباز شریف نے امیر حید ر ہوتی تو اس پر قائل کرنے کی کوشش کی مگر اے این پی کے دوٹوک موقف کے باعث انہیں کامیابی نہیں ملی، امیر حیدر ہوتی نے شہباز شریف کو پارٹی موقف سے آگاہ کرتے ہوئے کہا کہ اس پیشکش پر وزیراعظم کے مشکور ہیں کہ انہوں نے ہم پر اعتماد کا اظہار کیا۔
امیر حیدر ہوتی نے کہا کہ پارٹی اپنے موقف پر قائم ہے، بلاوجہ کی تاخیر سے آئینی اقدام کو متنازعہ بنایا گیا۔
واضح رہے کہ اس سے قبل پیپلزپارٹی نے خیبر پختونخوا کی گورنر شپ کے مطالبے سے دستبردار ہوتے ہوئے یہ عہدہ اے این پی کو دینے کی تجویز دی تھی، پیپلزپارٹی نے اے این پی کے رہنما میاں افتخار حسین کو گورنر خیبر پختونخوا بنانے پر آمادگی کا اظہار کیا تھا۔
