وزیراعظم عمران خان نے شاہین 3 بیلسٹک میزائل کے کامیاب تجربے پر قوم اور پاکستان فوج کو مبارکباد دیدی ہے۔
مائیکروبلاگنگ ویب سائٹ ٹویٹر پر وزیراعظم آفس کی جانب سے جاری کردہ بیان میں آئی ایس پی آر کے بیان کو ری ٹویٹ کیا گیا ہے اور کہا گیا ہے کہ شاہین 3 بیلسٹک میزائل کے کامیاب تجربے پر پاک فوج کو مبارکباد پیش کرتے ہیں۔
وزیراعظم عمران خان نے مزید کہا کہ ہم ایسی پیشہ ورانہ اور عالمی معیار کی افواج رکھنے پر فخر کرتے ہیں جو ہمارے ملک کی سرحدوں کی حفاظت کرتی ہیں، اس شاندار کامیابی کو حاصل کرنے میں محنت کرنے والے بہادر سائنسدانوں اور سپاہیوں کو سلام پیش کرتے ہیں۔
وزیراعظم عمران خان نے بیان کے آخر میں " ہم ایک ساتھ ایک پاکستان کیلئے متحد ہیں" کا نعرہ بھی لگایا۔
واضح رہے کہ پاک فوج کے شعبہ تعلقات عامہ (آئی ایس پی آر) کی پریس ریلیز کے مطابق پاکستان نے زمین سے زمین پر مار کرنے والے شاہین 3 بیلسٹک میزائل کا کامیاب تجربہ کیا ہے۔
آئی ایس پی آر نے اس تجربے کی ویڈیو بھی سوشل میڈیا پر جاری کی اور بتایا کہ اس تجربے کا مقصد ویپن سسٹم کے ٹیکنیکل ڈیزائن اور پیرامیٹرز کی اہلیت جاننا تھا۔