وزیراعظم عمران خان نے چینی کمپنیوں کے سربراہان کے وفد سے ملاقات کی، کمپنیوں نے پاکستان میں سرمایہ کاری کے لیے گہری دلچسپی کا اظہار کیا۔
وزیراعظم ہاؤس کی جانب سے جاری کردہ اعلامیے کے مطابق چینی سفیر نونگ رانگ بھی چینی کمپنیوں کے وفد سے ملاقات کے دوران موجود تھے۔ اعلامیے میں بتایا گیا ہے کہ وفاقی وزراء حماد اظہر، شوکت ترین، اسد عمر اور عبدالرزاق داؤد سمیت دیگر بھی ملاقات میں موجود تھے۔
چینی کمپنیوں کے وفد نے حکومت پاکستان کی سرمایہ کار دوست پالیسیوں کو سراہا اور پاکستان میں سرمایہ کاری کے لیے گہری دلچسپی کا اظہار کیا۔
ملاقات کے دوران وزیراعظم عمران خان نے کہا کہ حکومت ایز آف ڈوئنگ بزنس پالیسی پر تیزی سے عمل پیرا ہے، سرمایہ کاروں کو مراعات فراہم کی جارہی ہیں جبکہ انتظامی کارروائیوں کو آسان بنایا جا رہا ہے۔
وزیراعظم کا مزید کہنا تھا کہ چینی سرمایہ کاری سے پاکستان میں روزگار کے مواقع ملیں گے اور افرادی قوت ہنر سیکھے گی جبکہ صنعتی شعبے کی ترقی کے لئے پاکستان ہمسایہ ملک سے بہت کچھ سیکھ سکتا ہے۔
ان کا کہنا تھا کہ پاکستان میں درمیانی اور چھوٹی صنعت کی ترقی کے وسیع مواقع موجود ہیں، چینی کمپنیاں پاکستان میں درمیانی اور چھوٹی صنعت میں کردار ادا کر سکتی ہیں، ہر ممکن سہولیات فراہم کریں گے۔
وزیراعظم عمران خان نے مسائل ترجیحی بنیادوں پرحل کرنےکے لیے ماہانہ اجلاس کرنے کی یقین دہانی بھی کروائی۔
