سینئر تجزیہ کار نصرت جاوید نے کہا کہ ڈونلڈ ٹرمپ نے امریکی ریاست ٹیکساس کے شہر ہیوسٹن میں تقریر کرتے ہوئے عمران خان کا نام لیا اور ان سے متعلق جھوٹا دعویٰ کیا۔
پبلک نیوز پر اپنے پروگرام خبر نشر میں خصوصی گفتگو کرتے ہوئے نصرت جاوید نے کہا کہ ڈونلڈ ٹرمپ انتہائی جھوٹا شخص ہے، 3 جنوری کو قاسم سلیمانی کے قتل کا واقعہ ہوا،4 جنوری کو عمران خان نے اپنے آبائی حلقے میانوالی میں ایک جلسے سے خطاب کیا تھا اور ڈونلڈ ٹرمپ کہتا ہے کہ وہ ہفتہ گھرسے نہیں نکلے۔
نصرت جاوید نے کہا کہ ڈونلڈ ٹرمپ اپنی انتخابی مہم کے دوران اپنے کارناموں کا ذکر کرتے ہوئے قاسم سلیمانی کے قتل کا ذکر کرتے ہیں اور اس کے بعد عمران خان کا حوالہ دیتےہوئے کہتے ہیں کہ اس وقت کے پاکستان کے وزیراعظم عمران خان جو کہ ایک کرکٹر تھے اور ایک ہینڈسم شخص ہیں انہوں نے مجھے فون کیا اور قاسم سلیمانی کے قتل پر مبارکباد دی اور کہا کہ میں سات دن تک گھر سے نہیں نکلا۔
سینئر صحافی نے کہا کہ ڈونلڈ ٹرمپ اپنے کارناموں کا ذکر کرتے ہوئے نریندر مودی کا نام بھی تو لے سکتا تھا، کوئی اور نام لے سکتا تھا، عمران خان کا ہی کیوں لیا؟ یہ لابنگ کا نتیجہ ہے، لابنگ فرمز یہی سب کرتی ہیں، ٹرمپ کے منہ سے تعریف کروادینا ، عمران خان کو خوبصورت قرار دلوادینا بہترین لابنگ فرم کی کارکردگی کا نتیجہ ہے۔
انہوں نے مزید کہا کہ اس وقت دنیا لاکھوں ڈالرز خرچ کرنے کیلئے تیار ہیں کہ ڈونلڈ ٹرمپ اپنی انتخابی مہم میں ان کا ذکر کردیں، تو آپ کو یہ سوچنا چاہیے کہ ان کی لابنگ فرم کتنے بہترین طریقے سے کام کررہی ہے۔
