72 ویں مس یونیورس مقابلے کا آغاز 18 نومبر سے 2023ء سے ہونے جا رہا ہے جس میں دنیا کے 60 سے زیادہ ملکوں نے "مس یونیورس 2023ء " کیلئے اپنے ملک کی نمائندگی کرنے والی دوشیزائوں کا نام دے دیا گیاہے۔
ذرائع کے مطابق پاکستان پہلی بار مس یونیورس مقابلے میں حصہ لے گا جس کیلئے 200 درخواست دہندگان کے پول سے منتخب کی گئی 5 دوشیزائوں کے ناموں کا اعلان کر دیا گیا ہے جنہوں نے مالدیپ میں ایک فوٹوشوٹ میں بھی حصہ لیا تھا۔
سینئر صحافی وتجزیہ نگار انصار عباسی کی طرف سے خبر سامنے آنے کے بعد شدید تنقید کی گئی تھی۔ انہوں نے سماجی رابطوں کی ویب سائٹ ٹوئٹر پر اپنے پیغام میں نگران وزیراعظم سے پوچھا تھا کہ "مس یونیورس 2023ء " کے لیے 5 پاکستانی دوشیزائوں کو پاکستان کی طرف سے نمائندگی کرنے کیلئے کس نے اجازت دی ہے؟
انہوں نے اپنے پیغام میں لکھا کہ کیا حکومت پاکستان کی اجازت حاصل کیے بغیر کیا کوئی بھی پاکستان کی نمائندگی کر سکتا ہے؟"مس یونیورس 2023ء " میں 5 دوشیزائوں کو پاکستان کی نمائندگی کرنے کی اجازت کیا کسی وزیر، مشیر نے دی ہے یا اس کا فیصلہ وفاقی کابینہ نے کیا ہے؟
چند گھنٹوں بعد سینئر صحافی نے ایک اور ٹویٹر پیغام کرتے ہوئے بتایا کہ: وزیراعظم انوارالحق کاکڑ کی طرف سے اس معاملے کا نوٹس لے لیا گیا ہےاور انٹیلی جنس بیورو آف پاکستان (آئی بی) کو ہدایت کی ہے کہ پتا لگایا جائے پاکستان کا نام استعمال کر کے مقابلہ حسن میں "پاکستانی دوشیزائوں" کی شمولیت کا اعلان کون کر رہا ہے۔ وزیراطلاعات تو پہلے ہی میرے ٹویٹ پر معاملے سے حکومتی لاتعلقی کا اظہار کر چکے ہیں۔
نگران وزیر اطلاعات مرتضیٰ سولنگی نے انصار عباسی کے ٹوئٹر پر ردعمل دیتے ہوئے لکھا تھا کہ: حکومتِ اور ریاستِ پاکستان کی نمائندگی ریاست اور حکومتی ادارے کرتے ہیں۔ ہماری حکومت نے کسی غیر ریاستی اور غیر حکومتی فرد یا ادارے کو ایسی کسی سرگرمی کیلئے نامزد کیا ہے اور نہ کوئی ایسا شخص/ادارہ ریاست/حکومت کی نمائندگی کر سکتا ہے۔ختم شد!
نگران وزیر اطلاعات کی ٹوئٹ پر سماجی رابطوں کی ویب سائٹ پر ردعمل دیتے ہوئے سوشل میڈیا صارفین کا کہنا تھا کہ اگر یہ حکومت کی اجازت سے نہیں ہو رہا تو کس کی اجازت سے ہو رہا ہے؟ ریاست کو پہلے پتہ کیوں نہیں لگا؟ اور اب پتا لگ گیا ہے تو کیا ایکشن لے گی؟
ایک سوشل میڈیا صارف نے وزیر اطلاعات کی ٹویٹر پر ردعمل میں لکھا کہ منسٹر صاحب! اس بے ہودگی کے خلاف آواز اٹھانی چاہیے اور پاکستان کو اس حد تک گرنے سے بچانا چاہیے۔ پاکستان اور عالمی مقابلہ حسن، چہ معنی وارد! یہ کیا مذاق ہے۔ پاکستان کو تو عالمی مقابلہ مذہبی شدت پسندی، رجعت پسندی، میں نہ صرف شرکت کر نا ہے بلکہ جیتنا ہے!
منتظمین کی طرف سے مقابلہ حسن میں پاکستان کی نمائندگی کرنے کیلئے مقابلے کی ٹاپ 5 فائنلسٹ میں پنجاب سے 26 سالہ سبرینا وسیم، امریکی نژاد 19 سالہ ملیکہ علوی، راولپنڈی کی 28 سالہ جیسکا ولسن، لاہور کی 24 سالہ حرا انعام اور کراچی کی 24 سالہ ایریکا رابن ہیں۔ ووٹنگ ایپ پر پانچوں دوشیزائوں کی تصاویر آن لائن mupakistan.choicely.com کر دی گئی ہیں جہاں شائقین اپنے ووٹ سے پسندیدہ امیدواروں کو آگے بڑھانے میں مدد کر سکتے ہیں۔
- Featured Thumbs
- https://www.siasat.pk/data/files/s3/8ansarabbasiunimsisis.jpg
