کراچی کے نجی اسپتال میں سامنے آنے والے پہلے اومی کرون کیس کی تصدیق ہوگئی۔
تفصیلات کے مطابق کراچی کی خاتون میں اومی کرون کی تصدیق ہوئی جبکہ دیگردوافراد میں اومی کرون کےشواہد نہیں ملے۔اومی کرون وائرس کی تصدیق جینوم سیکونسنگ کے ذریعے کی گئی۔
ترجمان این آئی ایچ کی جانب سے ٹوئٹر پیغام میں کہا گیا ہے کہ کراچی سے موصول سیمپل میں اومی کرون پایا گیا ہے،اومی کرون کی تصدیق جینوم سیکونسنگ سے کی گئی۔
این آئی ایچ کا مزید کہنا تھا کہ کورونا کے پرانے و نئے ویرینٹ سے بچاؤ کیلئے ویکسی نیشن اہم ہے، شہری ترجیحی بنیادوں پر کورونا سے بچاؤکی ویکسین لگوائیں۔
ذرائع این آئی ایچ نے بتایا کہ اومی کرون پازیٹو 65 سالہ خاتون نے ویکسی نیشن نہیں کرائی تھی، کراچی سے موصول 3سیمپلز کی جینوم سیکوئنسنگ مکمل ہو گئی ، موصول ہونیوالے 2سیمپلز میں اومی کرون کی تصدیق نہیں ہوئی۔
دوسری جانب اومی کرون میں مبتلا 65 سالہ خاتون صحت یاب ہوچکی ہیں، متاثرہ خاتون سے رابطے میں آنے والے51 افراد کے ٹیسٹ کیے جا رہے ہیں۔
متعلقہ مریضہ کو اسپتال سے گھر منتقل کردیا گیا تھا جبکہ زیرعلاج کورونا کے کسی اور مریض میں اومی کرون کی تصدیق نہیں ہوئی۔متاثرہ خاتون کراچی کےآغاخان اسپتال میں زیرعلاج رہیں۔
اومی کرون کے حوالے سے ڈاکٹر جاوید اکرام کا کہنا ہے کہ اومیکرون اس وقت57ممالک میں موجود ہے لیکن اس سے اب تک کسی مریض کی موت واقع نہیں ہوئی۔
انہوں نے کہا کہ آج بھی 65 فیصد کیسز ڈیلٹا کے رپورٹ ہورہے ہیں جو یقیناً اس سے زیادہ خطرناک ہے، لہٰذا اس سے بچاؤ کیلئے کورونا ویکسین کی خوراکیں لگوانا انتہائی ضروری ہے۔
