سابق آسٹریلوی کرکٹر ایڈم گلکرسٹ نے اپنے نام سے منسوب ایک بیان کو جعلی قرار دیدیا ہےجس میں پاکستانی ٹیم کو بدترین قرار دیا گیا ہے۔
تفصیلات کے مطابق سماجی رابطے کی ویب سائٹ ایکس(ٹویٹر) پر آسٹریلوی بیٹسمین ایڈم گلکرسٹ نے ایک وضاحتی بیان جاری کیا جس میں ان کا کہنا تھا کہ سوشل میڈیا پر میرے نام سے منسوب کچھ من گھڑت بیانات پھیلائے جارہے ہیں جن کی میں مذمت کرتا ہوں۔
انہوں نے کہا کہ میں نے ایسا کبھی نہیں کہا، سوشل میڈیا پیج پر بالکل جعلی پوسٹ بنا کر شیئر کی گئی، پاکستان نے ورلڈ چیمپئن آسٹریلیا کے خلاف رواں سیزن میں شاندار کھیل کا مظاہرہ کیا ہے، پاکستان آسٹریلیا کے خلاف دو میچ میں تقریبا جیت کے قریب تھا۔
خیال رہے کہ گزشتہ دنوں سوشل میڈیا پر ایڈم گلکرسٹ سے منسوب ایک بیان وائرل ہوا تھا جس میں پاکستانی ٹیم کو تنقید کا نشانہ بنایا گیا تھا اور کہا گیا تھا کہ موجودہ پاکستانی ٹیسٹ ٹیم بدترین ایشیائی ٹیم ہے۔
