پشاور کے علاقے ریگی میں واٹس ایپ گروپ سے نکالے جانے پر ہونے والے اختلافات کے نتیجے میں ایک شخص نے دوسرے شخص کو فائرنگ کر کے ہلاک کر دیا ہے۔ پولیس کے مطابق یہ واقعہ ایک دن قبل پیش آیا، جب مقتول اور ملزم کے درمیان گروپ سے نکالے جانے پر تلخ کلامی ہوئی تھی، جو بالآخر قتل میں بدل گئی۔
پشاور کے تھانہ ریگی کے سٹیشن ہاؤس آفیسر (ایس ایچ او) معراج خان نے بی بی سی اردو کو بتایا کہ مقامی افراد اور قبیلے کے لوگوں کا ایک واٹس ایپ گروپ تھا، جس سے ایک شخص کو نکالے جانے پر اختلاف پیدا ہوا۔ انہوں نے بتایا کہ قتل سے قبل اشفاق اور مشتاق کے درمیان بحث ہوئی تھی، اور اگلے دن بات مزید بڑھ گئی۔
پولیس کی رپورٹ کے مطابق، مقتول مشتاق کے سوتیلے بھائی ہمایوں نے بیان دیا کہ واٹس ایپ گروپ سے نکالے جانے کے بعد اشفاق اور مشتاق میں تکرار ہوئی تھی۔ بعد ازاں، دونوں نے ایک دوسرے پر فائرنگ کی، اور ہمایوں اور مشتاق نے راضی نامہ کروانے کے لیے ایک مقامی حجرے کی طرف جانے کا فیصلہ کیا تھا، تاہم راستے میں اشفاق نے دونوں پر دوبارہ فائرنگ کی۔
ہمایوں نے مزید بتایا کہ فائرنگ کے بعد ان کے بھائی مشتاق اپنی جان بچانے کے لیے ایک پیٹرول پمپ کے کمرے میں پناہ گزین ہوئے، جہاں اشفاق نے ان پر گولی مار کر انہیں قتل کر دیا۔
ایس ایچ او معراج خان نے تصدیق کی کہ یہ واقعہ گزشتہ روز بعد دوپہر پیش آیا اور انہوں نے تفتیش شروع کر دی ہے۔ ان کا کہنا تھا کہ قاتل کو جلد گرفتار کر لیا جائے گا۔
