پنجاب پولیس امریکی سفارتخانے اور امریکی حکومت کے متعلقہ حکام کے سامنے اپنا احتجاج ریکارڈ کروائے گی: بیان
پاکستان تحریک انصاف کے رہنما ڈاکٹر شہباز گل کے ایس ایس پی انویسٹی گیشن لاہور ڈاکٹر انوش مسعود چودھری بارے ایکس (ٹوئٹر) پیغام پر پنجاب پولیس نے ردعمل دیتے ہوئے پاکستان میں امریکی سفارتخانے اور امریکی حکومت کے متعلقہ حکام کو شکایت درج کروانے کا انتباہ دے دیا۔
ڈاکٹر شہباز گل نے ڈاکٹر انوش مسعود بارے اپنے ایکس (ٹوئٹر) پیغام میں عمران خان کے فتح مکہ بارے بیان کا حوالہ دیتے ہوئے لکھا: فتح مکہ کی سنت ص پر بھی ان کا فیصلہ تو وہ بے گناہ عورتیں ہی کریں گی جن کو نا حق جیلوں میں رکھا گیا۔
انہوں نے اپنے پیغام میں لکھا: صرف اس لئے کہ محترمہ انوش مسعود میں اتنی اخلاقی دلیری نہیں تھی کہ غیر قانونی کام سے انکار کر دیتیں لیکن انہوں نے اچھی پوسٹنگ لینے کے لئے کچھ عورتوں کے گھر اور زندگی تباہ کر دی۔انشااللہ ان کا حساب ہوگا!
ترجمان پنجاب پولیس نے اپنے ایکس (ٹوئٹر) پیغام میں ردعمل دیتے ہوئے لکھا: پنجاب پولیس نے اپنی سینئر پولیس اہلکار ڈاکٹر انوش مسعود چودھری کے خلاف ڈاکٹر شہباز گل کی جانب سے عائد کیے گئے بے بنیاد اور بلاجواز ہتک آمیز الزامات اور اس کے ساتھ ساتھ جسمانی نقصان کی دھمکی کا سخت نوٹس لیا ہے۔
ترجمان پنجاب پولیس نے لکھا: ڈاکٹر شہباز گل کا انوش مسعود کے بارے میں بیان ایک سلجھی ہوئی پولیس اہلکار کے خلاف صنفی بنیاد پر تشدد پر اکسانا اور ایسے مذموم مقاصد کے حصول کیلئے مذہبی حوالوں سے استحصال کرنا قابل مذمت ہے۔پنجاب پولیس باضابطہ طور پر امریکی سفارتخانے اور امریکی حکومت کے متعلقہ حکام کے سامنے اپنا احتجاج ریکارڈ کروائے گی۔
ترجمان پنجاب پولیس کا فیڈرل انویسٹی گیشن ایجنسی، انٹرپول ہیڈکوارٹر، امریکی حکومت اور اسلام آباد میں امریکی سفارتخانہ کو ٹیگ کرتے ہوئے اپنے بیان میں کہا کہ پاکستان اور امریکہ میں ڈاکٹر شہباز گل کے خلاف قانون کے مطابق مناسب (سول وفوجداری) کارروائی شروع کرنے کے لیے درخواست بھی کی جائے گی۔
