اسلام آباد پولیس نے سڑک کنارے غبارے فروخت کرنے والی ایک غریب خاتون کے خلاف ایکشن لیتے ہوئے سارے غبارے اپنے قبضے میں لے لیے ہیں، صحافی برادری و سوشل میڈیا صارفین کی شدید الفاظ میں مذمت کے بعد آئی سی سی پی او نے واقعہ کا نوٹس لیتے ہوئے غبارے چھیننے والے اہلکار کو معطل کرنے کے احکامات جاری کردیئے۔
تفصیلات کے مطابق سوشل میڈیا پر ایک ویڈیو وائرل ہوئی ہے جس میں دیکھا جاسکتا ہے کہ اسلام آباد کی ایک سڑک سے گزرتی پولیس موبائل کے پیچھے غبارے بندھے ہوئے ہیں، یہ سارے غبارےسیکٹر آئی ایٹ مرکزمیں کھڑی ایک غریب عورت کے تھے ،متاثرہ خاتون کے مطابق پولیس نے کہا ہے کہ یہاں ٹھیلا کیوں لگایا ہے۔
متاثرہ خاتون نے کہا کہ میں اپنے بچوں کیلئے روزی کمانے کیلئے کھڑی تھی مگر پولیس والے سارے غبارے چھین کر چلے گئے ہیں،ویڈیو بنانے والے شخص کے مطابق یہ آئی نائن پولیس اسٹیشن کی ٹیم تھی جس نے یہ کارروائی کی۔
واقعہ پر صحافی برادری و سوشل میڈیا صارفین نے شدید مذمت کی اور پولیس کی اس کارروائی پر شدید ردعمل دیا، سینئر صحافی و تجزیہ کار حامد میر نے کہا کہ اشاروں پر بھیک مانگنے والوں کو کچھ نہیں کہا جاتا کیونکہ وہ پولیس والوں کو بھتہ دیتے ہیں، ایک غریب عورت غبارے فروخت کرے تو غلط ہے۔
رائے ثاقب کھرل نے ایک ویڈیو شیئر کی جس میں ایک پولیس اہلکار کو خاتون سے غبارے چھین کر لے جاتے ہوئے دیکھا جاسکتا ہے، انہوں نے کہا کہ اس کارروائی پر پولیس والوں کو تمغہ ملنا چاہیے، ممکن ہے خاتون نے یہ غبارے بھی قرض سے لیے ہوں۔
اقلمہ حیدر نے کہا کہ بظاہر یہ عورت تو بچوں کا پیٹ پالنے کے لئے غبارے بیچ رہی تھی لیکن اسلام اباد پولیس کو کیا شک ہوا کہ اس عورت کے پیٹ پر لات مار کر اسکی مزدوری ساتھ لے گئے؟ اس عورت کا قصور کیا تھا؟
حنا عباسی نے کہا کہ ابھی اسلام آباد میں اس غریب دیہاڑی دار خاتون کے دہشت گرد غبارے گرفتار کر کے اداروں نے ملک سے تمام جرائم کا خاتمہ کر دیا ہے ، مبارک ہو سب کو۔
راشد محمود بنگش نے طنز کرتے ہوئے کہا کہ اس کارروائی سے پولیس نے ہندوستان سے 1971ء کا بدلہ لے لیا ہے۔
آر جے امبر نے کہا کہ اس ملک کا کیسا نظام ہے، ایک غریب کیسے اس ملک میں رل رہا ہے۔
ایک صارف نے کہا کہ اس ملک پر بے شرم، بزدل اور گھٹیا لوگ مسلط ہوگئے ہیں۔
بعد ازاں اسلام آباد پولیس نے ٹویٹر پر جاری ایک بیان میں کہا کہ سوشل میڈیا کے ذریعے واقعہ کی اطلاع ملتے ہی آئی سی سی پی او نے نوٹس لیتے ہوئے خاتون سے ناانصافی کرنے اور غبارےچھیننے والے اہلکار کو معطل کردیا ہے۔
ترجمان اسلام آباد پولیس کے مطابق آئی سی سی پی او کے حکم پر متاثرہ خاتون سے چھینا گیا سامنا واپس کردیا گیا ہے، آئی سی سی پی او نے واقعہ پر برہمی کا اظہار کرتے ہوئےپولیس اہلکاروں کو ہدایات جاری کی ہیں کہ غریب محنت کشوں کو تنگ نا کیا جائے۔
