الیکشن کمیشن میں پی ٹی آئی کے انٹرپارٹی انتخابات کو کالعدم قرار دینے کیلئے درخواست دائر کردی گئی ہیں۔
تفصیلات کے مطابق الیکشن کمیشن میں اکبر ایس بابر اور پی ٹی آئی کے دو کارکنان نے الگ الگ درخواستیں دائر کیں، محمود خان اور مزمل خان نامی کارکنان کی جانب سے دائر درخواستوں میں الیکشن کمیشن سے پی ٹی آءی کے انٹراپارٹی انتخابات کو کالعدم قرار دینے کی استدعا کی گئی ہے۔
الیکشن کمیشن میں درخواست دائر کرنے بعد میڈیا سے گفتگو کرتے ہوئے اکبر ایس بابر نے کہا کہ بہت افسوس سے کہنا پڑرہا ہے کہ پی ٹی آئی کی جانب سے جو تازہ فراڈ کیا گیا اس کے خلاف درخواست دینے الیکشن کمیشن میں آئے ہیں، میں نے پریس کانفرنس کرکے اعلان کیا کہ پی ٹی آئی کے بانی چیئرمین اپناایک وکیل مقرر کریں ، ایک وکیل ہم مقرر کرتے ہیں تاہم ہمیں اس الیکشن سے دور رکھا گیا۔
انہوں نے مزید کہا کہ ہمیں یہ امید تھی کہ پی ٹی آئی اپنے کارکنان اور ورکرز کو حق دے گی، الیکشن میں دھاندلی کا رونا رونے والی جماعت اپنے ورکرز کو حق دیتی تو ان کا مینڈیٹ بھی تسلیم کیا جاتا، میں نے آج الیکشن کمیشن میں درخواست دی کہ ان کے خلاف کارروائی کی جائے کیونکہ یہ نہیں چاہتے کہ پارٹی کی قیادت ورکرز تک جائے۔
اکبر ایس بابرنے کہا کہ پارٹی کی خودساختہ قیادت کو اختیار نہیں ہے کہ وہ کسی اور جماعت کے ساتھ معاہدہ کرے، یہ معاہدہ بھی ختم ہوگا ہم نے یہ بات بھی اپنی درخواست میں لکھ دی ہے، پی ٹی آئی کے انٹراپارٹی الیکشن کا ڈھونگ ایک سب جوڈیشل معاملہ ہے، کیا وجہ ہے کہ بار بار بلا مقابلہ قیادت منتخب ہوجاتی ہے۔